Ynne ka sngi hapoh ka District Mental Health Programme (DMHP), Jowai Civil Hospital, Ialong da pynman ya ka World Mental Health Day ha Chutwakhu Indoor Sports Hall Cum Auditorium.
Ha kani ka sngi da yoh ya i kyntien pdiang burom na ka M. Bareh kawa man kam ka Community Nurse, DMHP da yoh leh ya i klam na u Waheh Chnong ka Chutwakhu, P. Lyngdoh.
Da yoh i klam na ka Dr. AM Pasweth, Psychiatrist District Nodal Officer, DMHP heiwa da khana ko ya ki kjut wa ha rukom kiwa ktah yei bor pyrkhat kiwa ye u sdang hadien wa jia iwon iwon kam i tyrrah kari, i dih ya ki mar pynmuaid, wa kiwi kiwi.
Ka S. Syngkon kawa man kam ka Clinical Psychologist da batai ko ya ka phang yong kani ka sngi iwa ong “Mental Health in an Unequal World” deiwa e nongmuna ya i chah ktah i bor pyrkhat ki bru nei wan ka khlam COVID-19 heiwa lada jia wa em wa khlaad na uni u khñiang kjut wei ymyoh u lai pyndep ya ka niam wa khaddooh.
Da yoh leh i batai na ka D. Tongper kawa man kam ka Psychiatric Social Worker kawa da kyntu ya ki khynnah wa chimbynta ha kani ka sngi wow man kiwa yarap ya kiwi tawon kiwa em chitom ha i bor pyrkhat. Da ong ko wa lada em ki lok yong ki kiwa dih biri ymtoh u kynchiñ næ u jngai na ki tangwa emkaam wow sneiñ ya ki.
