Jowai: Ka yaseiñ Khasi Jaiñtia Presbyterian Synod Mihngi kawa Khadynñiaw da man ko haka Balang Lumshnong Narpuh District, Narpuh Border Presbytery nadooh ka 14 hadooh ka 17 tarik u Wisu hajrong ka phang “To sharai, to iengskhem haka jingngeit” 1 Kor.16:13.
Da sakhi ya ka da ki paaid wangait ka Balang Presbyterian na kylleiñ ki chnong ki thaw ynne ka sngi bibar kiwa da yawan tooid da ki hajar ngut cha kani ka yaseiñ yow ap u sñiaw yei khubor yong i ktien u Blai naki pastor kiwa da e yei klam ha kani ka sngi.
Neitæ won da emlang leh ki kynrem ki lyndang kam u Vincent H Pala, MP ka Lok Sabha, u Shitlang Pale MLA ka thaaiñ, ki myntri ka sorkar jylla wa kynthup ya u Hamletson Dohling, u Kyrmen Shylla nalor ki MDC ka JHADC, ki heh sorkar wa kiwi.
Haka yaseiñ wa 10 waje da yoh i saam yei khubor yong ka ktien u Blai na u Rev. R.H.Lyngkhoi uwa da pynchong yurim naka Kitab u Joel 2:13, deiwa kyntu yaki paaid wa ngait wow wai ki yow dohnood hei rukom wa i mynsiem yong u Blai yow yoh u wow psiah haki.
Heiytoh weini da e nongmuna u ya u syiem David wa kat u Syiem leh hadien i leh pap da kyruiñ u cha u Blai. Kamtæ khut u yow paaid ka Synod wow kylla yumut ki.
Haka yaseiñ 1:30 won da yoh ya i klam na u Rev G.P.L Gadew, uwa da klam hajrong “I pap pyndem hei wym toh”, neibhah ki bru ha kini ki sngi yakhun ki du wow pynsñiawbha para bru katwa yow Blai won da myllin.
Da ong u “I pap pyndem hei wym toh”, toh kawa murieh yei sakhiat deiwa pynsñiawbha yow bru wei pynsariem wa kani ka pyrthai.
Ong u wa i rukom krehkaam “I pap pyndem hei wym toh”, kynthup wa boon ki bei ki kpa ha kini ki sngi wa hap ki wow pyndem haki khon yei wym toh sap du neidaw wa teiñ ki yaki khon, hanla ka ktien u Blai ong ko kam ki khon toh u burom u kongngooh yaki bei ki pa. Heiwa da e nongmuna u yow khon sarong awria wa u pa hap u wow pyndem ha u khon.
Neitæ ong u “I pap pyndem hei wym toh” jia ko leh hei chongkha chongman, haka kam saiñ hima sima, haka khayi pateiñ wa kiwi, deiwa e nongmuna ya ka Election wa dang dep heiwa kammon ki paidbah kiwa thap Vote ngat ki hei ya baam poisa na kiwa mihkhmat.
Kamtæ kyntu u yaki waheh wasian ka Balang wow yait nei yachim bynta hei chakri ar kynrad neibhah wym ye u pynsñiawbha pynarliang, lada yakhun pynsñiawbha para bru yow Blai won da lait.
Discussion about this post