Ki paaid wa ngait ka Balang Presbyterian ynne ka sngi da ya tooid ki da ki hajar ngut cha ka Jingiaseng Samla KJP Synod Mihngi kawa arphaw ar haka Balang Presbyterian Moolang, Iapmala District, Rymbai Presbytery, East Jaiñtia Hills District neibynta u chah chkoor ya ki khubor na ka ktien u Blai, lyngba ki rwai ki Choir na ki Balang waphær waphær, kamjooh leh lyngba ki Pastor kiwa da e i klam næ saam yaka khubor ha kani ka sngi.
Kani ka yaseiñ da sdang ko nadooh ka 1 tarik wei da pynkut ynne ka 3 tarik wei ka phang pyrdi yong kani ka yaseiñ toh kawa ong “Ka Jingim ba riewblei haka pyrthei ba mynta”.
Kiwa chah khut sñiawbha wa da wan emlang ha kani ka yaseiñ kynthup ya u Kyrmen Shylla, Montri ka sorkar jylla uwa man leh u MLA ka thaaiñ, u Thombor Shiwat, CEM JHADC deilang wa kiwi won ki MDC ka JHADC kam u Phasmon Dkhar, u Evening Teron, u Finelyness Bareh najrong u SP ka West Jaiñtia Hills District u C. Syrti wa kiwi.
U Rev. (Dr) H.C.T. Sumer hawa saam yaka khubor na ka ktien u Blai haka yaseiñ wa ar yong ka noh chariñ sngi da klam u hajrong ka phang “Ki khiew ki bym lah ban pynlwet” deiwa pynchong yurim naka chithi wa ar u Paul chaki Nongkorin ka lynnong wa 4 dkhot wa 7 wei wa 8.
Lyngba kani ka phang ong u kam ki bru im i haka juk wa kat nanglai ki por ki snem da nang ngam i hei yillu yong kani ka pyrthai, wei ki bor wa phon wa taan ya i nang khlan ki na ki liang waroh, deiwa sakhi ya boon ki mynsien ki khon khynroo kiwa chah khnioñ wei chah pynlakhit ha kani ka pyrthai.
Tangwa ong u sñiawkmen won wa kani ka khubor pynkynmoo ko wa hawa u Paul thoh u ya kani ka chithi em won leh kitæ kiwa ye u yieñ skem ha kam kani ka pyrthai hei chah khioñ chah pynlakhit namo dang em kitæ ki khynroo næ ki kchu wym pu em chah pynlakhit.
“I ki bru man i kam kitæ ki kchu khyndaw kamtæ ymtoh u im jngai na u Blai lada kwah i wow man kiwa embor, kiwa yoosuk. Tangwa toh u pyndap yeiwa kordor hapoh u kchu, neibhah i hi kam ki bru hawa em iwa kordor hapoh yong i, la wan mynkna iwon iwon i bor wow khnioñ wym chah pynlakhit i,” Ong u Rev. (Dr) H.C.T. Sumer.
Da pynrap haroh u deiwa ong, hanla em i katni hei sahir wa ki bor ka pyrthai khnioñ ki ya i haki liang waroh, tangwa e ngooh ya u Blai wa booh u hapoh yong i yei kynchew wa kynja mynsiem deiwa pynman ya i kiwa kordor wa yoosuk tam, kiwa phær na kiwi tawon wei kiwa khlanbor wot hawa ki bor wa khñioñ ya i na waroh soodong leh wym ye ki wow pynjæd pynpra la kammon kammon leh.
Kamtæ kyntu wow ksoh skem yei kynchew wa da booh hapoh yong i wei wow pyntooid leh cha kiwi dei maya.
Wei lada em won kiwa sñiawthooh ya idæ wa da chah tooh noh i kynchew bneiñ napoh yong ki, i por da toh wow duwai ki khnang wa u Blai u pyndap biang u sa chisien yei kynchew bneiñ ha u nood yong ki.
Discussion about this post