Jowai: Ki paidbah yong ka 1-Nartiang Constituency ynnin ka 8 tarik da mih paidbah ki cha ka General Meeting næ ka yalang paidbah yong u Sñiawbhalang Dhar wa da pyllai daka NPP Nartiang Block Unit ha chnong Wahiajer hei wan sakhi lang u National President ka party u Conrad Sangma MP ka Tura, ki MLA wa dang dep ieh kaam kam u Stephanson Mukhim, u Ngaitlang Dhar, u Hopefull Bamon, u Prestone Tynsong, u H.S. Shylla, u State President u Dr. W.R. Kharlukhi, ki MDC ka JHADC kam u Thombor Shiwat, P. Nanglein, M. Rymbai wa kiwi kiwi.
U Conrad hei klam yong oo ha kani ka sngi ong u, da yoo ha kini ki sngi ya ka la-ær yong i kylla neibhah ki bru da dooh ki i chaniah haka Congress wei ini jia i haka ri hi waroh kawi, wa neiwa jooh yoh ka Congress u synchaar ha ki 18 tylli ki jylla ka ri katni won sah sadu 4 donhi.
Heini ha fylla da yoo ya ki dak ki chin pyn na kiwa yahkhmat yong ka hi wa kynthup ya u Dr. D.D.Lapang, Deputy CM u Dr. R.C. Laloo ki wym yakhun dæ haka Election wow wan toh wym em de yoo poi thong ki ka Congress ini pynyoo daki leh ym sñiaw skem de ki, ki paidbah pathan da tip hi.
Ong u wa ka Congress da kyrbeh ko katni heiwa da pyrchang ko u pynbiej daka Scheme sorkar wa boon jait heipor wa tbian yow thied vote na ki paidbah.
Chooh chooh ong u wa ha kini ki sngi ki bru ka jylla da maad ki yei dooh wei hawa kyruiñ u soodong ka ri-loom Jaiñtia ka kamai kajih i kreh i khih wa jooh chaniah ki ha u mooyong da dooh lut ki wei hadooh ynne ka sngi leh ym em leh u Mukul iyi iyi.
Da pynbaad u wa u Dr. Mukul da chim lut u yei khih i kreh u paidbah kamjooh ka mynried ki khon ki kti. Kamtæ ong u lada e ki paidbah i khyrchaan yaka NPP daw yakhun ko yei hok yong ki wei u chimkhia ya kani ka phang kamwa jooh man.
Da kular u wa lada e kyrchaan pura ki paidbah ya ka party daw wanrah ya ka jylla wa thymme lyngba ka krehakaam wa thymme wa kiwi won ki kylla.
U Sñiawbhalang hei klam da ong u ha ki snem wa dep hapoh i pait yong oo da pynbiang lut u ki sarok ki luti syngkieñ cha ki paaid ka Constituency yong oo neibhah tip u wa u sarok toh u budloom wa kongsan yong i roi i paar ki paidbah, kamtæ ha kani ka kynti won kamwa da lai u cha kawi won ka party ka NPP ka chaap wa em da ka kot, kular u wa neini chakhmat won u pait u hei yatoh i puræ puthi i stat i tip.
Da khana u wa boon kiwa yahkhmat wa kylli ya oo neiyi i daw wa yut u na ka Congress næ wa yasih u wa u Dr. Mukul, da jubab u toh neidaw ki paidbah ymtoh neidaw samen næ ka yung ka sem, neibhah ong u da jied ya oo wow chakri ya ki paidbah ymtoh ya ka yung ka sem yong oo hi.
U Ngaitlang hawa klam da ong u, ka yung ka sem yong ki toh kawa da kyrkhu kyrpang u Blai nadooh ka spah ka phaw wa ka spah mynsien heiwa iwon iwon wa mut wa thrang da man i iwa lai bait lai ryntih. Da ong u wa neidaw wa e u Blai ha ki u nood wa heh hawa chakri ki ya ki paidbah leh ym em chakri ki du kat naka Scheme sorkar tangwa nei minot yong ki leh kamjooh ym em budnood ki neibhah da thoh ya ki wow chakri paidbah.
Da ong uleh ha kani ka kynti ki 4 tylli ki Constituency haka jylla man ki kiwa embhah tam wow yoh kyrtong ki na kajooh ka manyung, kiwa kynthup ya u Sniawbhalang na Nartiang Wahiajer, u Ngaitlang na Umroi, u Wailadmiky na Jowai wa u Dasakhiat na Mawhati.
Ha kani ka sngi kiwi won wa klam kynthup ki ya u Prestone Tynsong, H.S. Shylla, Wailadmiki Shylla, ka Phidalia Toi wa kiwi kiwi.
Discussion about this post