Jowai: Ynne ka sngi kawa man leh ka sngi khaddoh wow yalap Election, u kyrtong yong ka NPP na 2-Jowai Constituency u Wailadmiki Shylla da pynman u ya ka yalang paidbah ha Khliehtyrshi heiwa da wan sakhi da kiwa boon ki paidbah kiwa kyrchaan ya oo.
Ha kani ka yalang da da em leh u MB Rymbai, MDC JHADC, u P. Lyngdoh (Ex MDC), u CS Kyndiah wa kiwa kitkaam ka Party NPP wa kiwa heh chnong waphær waphær ki chnong.
Ha kani ka yalang u kyrtong ka party hei klam yong oo da ong u wa u National President ka Party NPP uwa man leh u MP ka Tura u Conrad Sangma da kular u wow pyndep noh wow chna ya ka Iawmusiang Shopping Complex kamjooh ki kaam saam umbaam umdih.
Da ong u leh wa lada poi ha ka thong i jop u kreh u neibynta wow pynbiang ya i duna ka Jowai Civil Hospital yow poi kyrdan ko wa kiwi ki Hospital kam ka Shillong Civil Hospital wa ka Tura Civil Hospital.
Hei yatoh won wa ki kaam Sports daw thooh laad u wow pynbha ya ka Kiang Nangbah Stadium, wow booh ya ki Coach wow sikai ya ki khynroo khyllood ym du ha ka yalehke Football kamjooh leh ka Boxing, Martial Arts wa kiwi kiwi.
Da ong u leh wa ya ka Kiang Nangbah Government College daw thooh laad wow pynbha ka yow man ko kam ka Tura Government College heiwa kiwa sikai toh kiwa biang wei kiwa puræ ka KNGC ym emkaam de ki wow mih cha sarok wow dawa yei hok yong ki. Ym mylliñ u leh ya ki ITI waka Jowai Polytechnic.
Da kular u leh wow boodien ya ki thaw wa sonteri yeiwa mih wa psiah ki baar jylla.
“Ka wah Myntdu kawa man ka Tawiar Takan namo kawa yada ya ka chnong Jowai daw pynbiang ya ki Sewage Treatment Plant ha waroh ki dooid li liar khnang wa ki jakhlia ym poi ki cha kani ka wah” da ong u Wailadmiki Shylla.
Discussion about this post