Tympiah kiwa na Karbi ya u moopood ha Khanduli, maham e Quit Notice ki ar seiñ ya ki Karbi

Jowai: Ka Jaiñtia Students’ Union (JSU) chirup wa ka Jaiñtia Youth Federation (JYF) ynne ka sngi da yachem ki ya u Deputy Commissioner ka West Jaiñtia Hills wei da e ki ka dorkhat heiyatoh wa i pynawri pood ki kattu katni ngut ki paaid Karbi Anglong ryngkat wa ki MDC ka Karbi Anglong Autonomous Council (KAAC).

Neiliang yong ki ar seiñ mar tip yeini da hiar ki cha Khanduli ha ka 29 Naikhynde ryngkat wa kiwa kitkaam chnong ka Khanduli wei manda liwan ki na kani ka chnong heipor kamwa 4:00 waje nohchariñ ka sngi da wan hiar sa ki Magistrate wa u SP ka Hamren District wa ki ar ngut ki MDC u Rupsing Teron wa ka Rina Terangti wa u Augstine Hanse uwa man leh u Chairman ka Peace Committee wa da chna hapyrdi ki Pnar wa ki Karbi wow pait yei chongsuk ha ka thaaiñ Khanduli wei da tympiah wei da khloh leh ya u moodpood wa chna ka chnong.

Kiwa chong chnong ka Khanduli wa u waheh chnong da ong ki wa kani ka thaw ymtoh ka Interstate Border tangwa man ko ka khappood chnong hapyrdi ka Khanduli wa ka Syntong laper.

Neiliang ki ar seiñ da beiñ ki yeini i wan leh embor ki heh ka KAAC wa ki bor District ka West Karbi Anglong.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Da dawa leh ya ki bor District ka West Jaiñtia Hills wow chimkhia hajrong ini khnang wa ki bru wa chong ha kini ki thaaiñ u lait ki u chong syir.

Ki ar seiñ da maham ki leh wa lada pteiñ ini i wan kyntoor pood ym yohsa ko daw haap e ko da ka Quit Notice ya ki Karbi wa chong wa sah hapoh u pood u ang ka ri loom Jaiñtia.

Ini da sdang i nadooh ka 20-09-18 heiwa ki bor District yong ka Karbi Anglong District (Assam) da wan ki wow tympiah ya u moopood uwa em ha ka thaw wa tip kam ka Pdeinlanghuh ha ka chnong Khanduli.

Neiliang u waheh chnong ka Khanduli u Molin Ramut da ong u wa ha ka tai ka sngi ki nong Karbi Anglong deilang wa ki Magistrate wa ki pulit yong ki, da wan ki wow tympiah ya uni u moopood wei hadien ini kiwa chong chnong Khanduli da pynchna biang ki wow booh ya u moopud wa thymme ha ka 27-09-18 katwa ha ka 29-09-18 hadien wa mih ki seiñbhalang na kani ka thaw booh moopood da wan biang wow tympiah wei da khloh syndon ya uni u moopood wa thymme da ka pooh chiloom hei emlang ki pulit Assam.