I lai luti ka Ladthadlaboh wow psiah cha ka Semifinal ka Meghalaya State League 2023 da tyngkhooh moo chynthut ynne deiwa rem ko da 1-0 ha ka Youth Club Pdengkarong ha Kiang Nangbah Stadium, Jowai deiwa bakla uwa yang kool, u Juhhi Suchiang uwa da tia ware chakhmat yow lai kem ya ka bol kawa da hær najrong khlieh u kawa da man ka kool u Menri Buam ha ka minit wa 27 wei kani da man ko ka yalehke ka Group B.
Ini da wailaad ko ya ka Rangdajied United yow pynskem yei kyrdan ki kam kiwa yoh nyngkong ha ka Group B hanla waroh ar liang da em ki mar 10 Point tangwa ka Rangdajied daw yaleh ko sa chisien wei lada rem ko leh daw tam hi ki deiwa kheiñ da iwa thap kool (Goal Difference) iwa da +11 la +8 cha ka Rangdajied. Ka Pdengkarong da rem ko ha waroh kiwi ki le tylli ki yalehke wei ini i jop daw e mynsien ko ya kiwa kyrchaan yong ki kamjooh ka Amlarem Block Sports Association.
Ha ka Group A won, ka Umkseh da wan ko nadien yow jop ya ka Jyntru da 3-2 yow man leh i jop wa nyngkong yong ki ha kani ka lympung. Ha ka Group D, ka Atong Matgrik da ye ko wow jop hadien wa da chah thap da 3-2 ha ka kylla step yow pynrem ya ka Warima Youth Club da 4-3 wei da man ko leh ka sien wa nyngkong ya ka Atong Matgrik wow yoh ko 3 Point ha kani ka MSL 2023.
Ha ka Group C won hapyrdi ka Mawten waka Seven United da kut khlem em wa yoh u thap kool.
Ki yalehke mynstep:
Group A, Shillong – Umrit Vs Mawlai, 3:00 Pm
Group B, Jowai – Mulait United Vs Sein Pynbhalang, 2:30 PM
Group C, Mawkyrwat – Shillong Lajong Vs Pyndengrei, 3:00 PM
Group D, Tura – Selsella Sports Association vs Chipakkore, 3:00 PM
