Ka lieñsuiñ ka IndiGo waka Air India Express da ya tyrrah ki ynne i step heipor kamwa 11:00 waje ha Netaji Subhas Chandra Bose International Airport, Kolkata tangwa da man i malu mala wei ym em jia iwa sñiawsih.
I kyndian ka thawanær ka Air India Express da kheiñ i hadien wa chah tyrrah ha ka lieñsuiñ ka IndiGo. Kani ka lieñsuiñ ka Air India toh kawa dang pynyieñ yow lai hær cha Chennai katwa ka IndiGo toh kawa da sdang khih yow hær cha Darbhabga heiwa ka thawanær ka IndiGo da nioñ wei khoi donhi i.
Kani ka lieñsuiñ ka Air India toh kawa da em 163 ngut ki bru hapoh deilang wa 6 ngut kiwa pynlai ka wei dang yang ko cha rood yow yohbor u hær noh heipor wa wan ka lieñsuiñ ka IndiGo kawa da lymbub ka.
Hapoh ka lieñsuiñ ka IndiGo da em 149 ngut ki bru deilang wa 6 ngut kiwa pynlai ka.
Ka Directorate General of Civil Aviation da pyntip ko wa da pyndam ko yei pyrtuid ki Pilot ka IndiGo kam kiwa yah lieñsuiñ katwa dang pynman yei takit wei ka takit u man ko leh ya kitu kiwa embynta wow kdaw wei pynlai ya ka lieñsuiñ kiwa em ha khyndaw.
Waroh ar tylli kini ki lieñsuiñ da pynsangeh ki wei ym em chah u hær ki wei ki paidbah leh da hap ki wow hiar.
Discussion about this post