U President ka Hynniewtrep Youth’s Council (HYC), u Robertjune Kharjahrin da ong u wa chwa wa ka sorkar u soi ko ya i pynbait pood hapyrdi ka Assam wa Meghalaya emkaam wow pynche chwa ko hapoh ka yung Dorbar Chna Aiñ ka jylla neibhah wa hawa kut i bor wow rai khaddooh toh hapoh ka dorbar ym du ha ka sorkar.
Da ong u wa lada wanrah chwa yeini ha ka yung Dorbar Chna Aiñ daw em i yatylli, wei du i yatylli daw ye wow pynbait ya i kaam pood.
Ka seiñ da ong ko leh wa ym elaad ko ya ka Assam wow kyntoor pood ko cha kiwi ki thaw hajrong yong ki 12 tylli ki thaw wa da tipmit kam ki thaw wa kajia pood deiwa ong leh wa ka seiñ da yoh yutip ko wa ka Assam daw yaleh ko wow kyntoor pood cha kiwi ki thaw.
Chooh chooh da ong u wa ka seiñ da yoh yutip ko wa ka Assam da sdang ko wow pynthut ya ki bru kiwa mynjur wow em cha Meghalaya deiwa rah-kti heipor wa wan sylli ki Regional Committee, deiwa ong leh wa ka seiñ da dawa ko na ka sorkar wow pyndooh ya i chah pyndik ha ka Assam neibhah wa lada kiwa chong chnong kiwa sah ha khappood chah pynthut ki ymye hiwot wow pynbait ya u pood hapyrdi ki ar jylla.
