Ka seiñ Hynñiewtrep Youth’s Council (HYC) ynne ka sngi da e dorkhat ko cha u montri rangbah ka jylla, u symbood montri rangbah wa u montri ka chnat ki kaam pohyung ka jylla heiyatoh wa i thung kreh Director General of Police (DGP) kawa man ka kyrdan wa khlieh dooh yong ki pulit ka jylla.
Ha ka dorkhat ka seiñ da ong ko wa katkam ka yutip wa da yoh ko da ong wa u DGP ka jylla uwa katni, R. Chandranathan, IPS (1986 Batch) ya uwa da ksoh ya ini i kaam nadooh ka 06-11-2018 u kut noh i ha u Khonchonglad-Kmaichonglad.
Da ong ko wa hadien wa chong-ngiah noh u DGP wei katkam ki kyndon ka aiñ da emkaam wow thung pyndap ya ini i kyrdan da ki sahep pulit da kiwa heh kyrdan dooh (Senior-Most Officer) ha ka jylla wei yeini da leh da ki sorkar kiwa dadep heiwa da thung ya ki katkam i kyrdan wa ka pali yong ki.
Ka seiñ da kdaw ko leh wa katkam ka website ka Meghalaya Police wa da em ki thup ki sahep pulit IPS Assam-Meghalaya Cadre (Meghalaya Wing), ka sahep wa bood sarin (Senior Most Officer) hadien u DGP wa katni toh ka Idashisha Nongrang, IPS (1992 Batch), kawa man katni kam ka Additional Director General of Police (L&O/TAP), Meghalaya, Shillong.
Hajrong kini ki yurim waroh ka seiñ da ban joor ko wa ka I. Nongrang, em hok bha ko wow yoh ya ini i kyrdan wa khlieh dooh ki pulit hapoh ka jylla heiwa da man ko ka bru kawa chemphang wow yahkhmat ya ka chnat waroh kawi.
Heijooh i por ka seiñ da ban joor ko wa ha ka jylla da em i hiar pateiñ cha ka kynthai (Matrilineal Society) kamtæ i yoh ya ka sahep wow khlieh dooh ya ka chnat ha ka jylla daw man i kaam wow sñiaw sarong ya ka jylla hi waroh kawi.
