Ka sorkar pyrdi da sdang ko wow e kse yei dawa pynkrehkaam ILP hapoh Meghalaya heiwa neiliang ka sorkar jylla da tyrwa ko wow pynkrehkaam ya ka kynja ILP deiwa thaplang wa ki kyndon ka aiñ thymme wa tip kam ka Immigration and Foreigners Act, 2025, wei yeini da pyntip da u Deputy Chief Minister, u Prestone Tynsong.
Da khana u wa yeini da yaklam ini wadep ha New Delhi wa u Amit Shah deilang kiwa na Meghalaya kiwa yahkhmat da u Chief Minister, u Conrad K. Sangma heiwa da ya phyllu wow jied da ki kyndon thymme ka aiñ ka sorkar pyrdi yow man ko kam ka ILP ha Meghalaya.
Da ong u wa hapoh ka aiñ Immigration and Foreigners Act em ki kyndon wa man kam ka ILP wei deiwa pynkrehkaam ya kini daw pynman ya ka Meghalaya kam ka thaw wa da yoh yei yada (Protected/Restricted Area) katkam ki kyndon kani ka aiñ.
Da pyntip u leh wa u Home Minister da pynyoo u yeiwa sñiaw mynjur wei hajrong ini daw yachem wa u Union Home Secretary, u Govind Mohan ha ka tayaaw wow wan deiwa emlang u Chief Secretary ka jylla, u Shakil P. Ahammed wa ka Director General of Police, ka Idashisha Nongrang yow pynkhreh ki ya ki kyndon krehkaam katkam kani ka aiñ.
U Prestone da ong u wa i thmu toh wow pynkupbor ya ka sorkar jylla wow phah paan Permit ya kiwa na baar ri kamjooh kiwa na baar jylla chwa wow psiah ki cha Meghalaya wei u sariem ko wa ka ILP kawa em ha Arunachal Pradesh heiwa da hap wow leh ya ka Online Registration ha ki thaw psiah chapoh ka jylla.
Da ong u leh wa kini ki kyndon daw man ki kiwa khlan bar ya ka ILP yow pait yei psiah ki bru pyrchah ya ka aiñ khamtam hawa pait yei long i man ha Bangladesh kattæ neibhah ka Meghalaya em ko ya u pood u wym pu em da kær bha.
Hawa kylli lada daw pdiang ki seibhalang ya ini, da ong u wa sñiawskem u wa daw kyrchaan ki neibhah kani leh man ko kam ka ILP hapoh ka aiñ Immigration and Foreigners Act wei deiwa leh kamni ym emkaam de ya ka aiñ kawa neibynta ka Meghalaya wei lada yoh yei mynjur, ka sorkar jylla daw ye ko wow pait yei psiah i mih kiwa na baar ri wa baar jylla.
Discussion about this post