Ka West Jaiñtia Hills District Cricket Association waka East Khasi Hills Cricket Association da jop ki ya jar jiar ki yalehke yong ki ha ka U-14 Girls Inter District Cricket T20 Tournament 2023 ha Nongstoin ynne ka sngi.
Ka WJH da ya thaiñ bha i yaleh ko waka West Khasi Hills DCA, heiwa da jop ka WJH da 9 Run. Ya ka WJH da phah Bat nyngkong heiwa da kamai ki 146/8 na ki 20 Over, heiwa ka Anastesia S Shullai da kamai boon dooh ko da 41 Run katwa ka Sawakahi Syngkon da yoh ko 19 Run. Ha iwi i por, ka WJH da yoh ki 92/2 tangwa ka Adelia Fedelia Lyngkhoi da yoh ko 2/13 da ka bol wei da emkti ko leh wow pynyoh 4 tylli ki Run Out yow pynsuki yei kamai Run.
Ka Lyngkhoi da lehbha ko leh da ka Bat wei da yoh ko 43 Run. Tangwa ka Sawakahi Syngkon da yoh ko 4/10 da ka bol kawta ka Alvarine S Shullai da yoh ko 2/28 iwa da pynkut yei kamai Run ka WKH da 137/7. Kamtæ ka Syngkon da yoh ko yei naam Player of the Match.
Ha kawi won ka yalehke, ka Shillong Cricket Association da phah Bat nyngkong ya ka da ka EKH wei da kamai ki 86 Run na ki 16.4 Over. Da em le ngut kiwa Bat kiwa da yoh palat 10 Run wei da kamai boon dooh ka Leeny Rai da 15 Run. Ka Habandarisha Shangpliang da yoh ko 3/29, ka Lawaijanai Synnah (2/14) waka Eliza Lyngdoh (2/28) toh kiwa da yoh pynhaap Wicket.
Ka EKH ym em chem chitom ko wow kdong ya kani ka thong deiwa jop da 8 Wicket wei deiwa sah leh 8 Over. Ka Sharaisuk Marpna da kamai boon dooh ko deiwa yoh 26 (Not Out) deiwa neh hadooh wa kut. Ka Shangpliang da yoh ko yei naam Player of the Match.
