Ka Tura District Cricket Association da wan ko deiwa chah tam ha ka Innings wa nyngkong yow jop ya ka South Garo Hills DCA da 212 Run ha ka Zone 2 ka U-15 Inter District Cricket Tournament 2023 ha Williamnagar ynne.
Ha kawi won ka yalehke, ka West Jaiñtia Hills DCA da jop ko ya ka East Khasi Hills Cricket Association da chi Innings wa 77 Run ha ka Zone 1 ha Umbuda, Ri-Bhoi.
Ynnin ka EKH da jop ko ya ka kylla khlem wei da jied ko wow Bat nyngkong heiwa da kamai ki 136/10. Kiwa boon na kini toh kiwa dat da u Nangsan Shaphrang Kynter (58) katwa da ka bol da lehbha u Eshan Siangshai 3/33 ya ka WJH.
Ka WJH da kamai ko 281 All Out ha ka Innings wa nyngkong deiwa kamai boon dooh u Maremdorkini Sutnga 56 wa u Neheimaia Gatphoh 49. Ka EKH da pynemkaam ko 4 ngut kiwa kawang bol heiwa da lehbha u Everbloom Nongrum da 2/21.
Kamtæ ka EKH da emkaam ko 145 Run ha ka Innings wa ar yow phah Bat biang ya ka WJH tangwa da pyndik u Namewanki Pakyntein uwa da yoh 5/10 heiwa ka EKH da haap lut ki deiwa kamai du 68 Run donhi. U Namewanki ha ka Innings wa nyngkong da yoh u 2/28 iwa mut wa waroh da yoh u 7/38 wei da ka Bat won da kamai u 34 Run yow yoh yei naam Player of the Match.
Ha ka yalehke ha Williamnagar won, ka SGH da emkaam ko 297 Run yow jop tangwa da ye ko wow kamai du 84 Run donhi.
Ka Tura da kamai ko 158 Run heiwa ka SHG da jubab ko da 244/8 Declared ha ka Innings wa nyngkong. Ka Tura da jubab won ko da 382/8 Declared heiwa ka SGH da kamai ko 84 Run donhi.
