Ka Shillong Cricket Association waka Tura District Cricket Association daw yachem ki ha ka Final ka U-15 Inter District Tournament ka Meghalaya Cricket Association hadien wa waroh ar da jop ki ynne ha ki yakhun Semi Final ha Nongkhrah, Nongpoh.
Ka TDCA da jop ko ya ka All Jaintia Cricket Association da 25 Run katwa ka SCA da jop ko da 10 Wicket ya ka East Garo Hills Cricket Association.
Ka Tura da jied ko wow Bat nyngkong hadien wa jop ya ka kylla khlem wei da ye ko wow kamai 9 Run chi Over deiwa kamai 182/5 na ki 20 Over. U Man-of-the-match u Harshit Prasad da kamai u 79 khlem haap na ki 60 bol wa kynthup ya ki 13 tylli ki 4 Run wa kawi ka 6 Run. Soo na ki san ngut kiwa kawang bol da yoh ki wow pynhaap Wicket deiwa lehbha dooh u Maremdor Sutnga (2/35).
Hawa kdong, ka AJCA da ye ko wow kamai 157/8. Kam ka Tura, ki leh da lehbha da uwi uwa Bat- u Heiyoomiki Ryngkhlem, uwa yoh 75 Not Out na 64 bol wa kynthup ya 12 tylli ki 4 Run. Ka Tura da pynemkaam ko 6 ngut kiwa kawang bol, heiwa na kini 5 ngut da yoh ki wow pynhaap Wicket. U Agatchu Chetai K Marak (2/20) wa u Darnel Bilkam M Sangma (2/25) da yoh ki mar ar Wicket.
Ha ka Semi Final wa ar da man ko kawa jem chiliang heiwa ka EGH da jop ko ya ka kylla khlem wei da jied ko wow Bat nyngkong tangwa da ye ko wow kamai du 45 Run. Du arngut kiwa Bat da ye ki wow poi cha ki 10 Run wa kamai boon da u Happynews M Sangma, uwa da Bat hei khynde uwa da yoh 14 Run. U Man-of-the-match u Aashish Kumar Lohar da yoh u 4/11.
Ka SCA da poi suk ko cha ka thong khlem dooh Wicket heiwa u Rudra Singh Rathore da yoh u 24 Run wa u Krishiv Choudhary 14 Run ha ka Over wa 6.
Ka Final daw pynman ha Nongkhrah, ha ka 30 tarik hapyrdi ka Shillong wa Tura, kiwa man leh ki arliang kiwa khlan dooh ha kani ka Tournament.
