Ka Tura District Cricket Association da jop ko yaka West Jaiñtia Hills District Cricket Association da 6 Wicket yow man kam ka liang wa nyngkong wow psiah cha ka Final ka U-19 Boys Inter District Cricket Tournament wa pynman da ka Meghalaya Cricket Association ha ka yakhun Semi Final wa nyngkong wa da pynman ha Salpara, Mendipathar ynnin ka sngi.
Ka WJH da yoh ko wow poi cha ki yalehke Knockout kam ka Top Team ka Zone 1 hapoh ka Group B, katwa ka Tura toh kawa yoh wa ar ha ka Zone 2 kawa em kawi donhi ka Group.
Ka WJH da jop ko yaka kylla-khlem wei da jied ko wow Bat nyngkong tangwa da yoh ko du 116/9 na waroh ki 40 Over kiwa da kamai boon da u Ewanmidao Pyrtuh (24) wa u Dawanchwami Passah (25).
Kiwa kawang bol ka Tura kiwa da lehbha toh u Ben Haden N Marak uwa da yoh 3/9 na ki 5 Over neitæ u Fernando Barbaryo M Sangma (2/21) wa u Denikcheng Marak (2/25) kiwa da yoh mar ar Wicket.
Na kiwa kawang bol ka WJH da lehbha u Chwamiki Ryngkhlem uwa da yoh 3/27 heiwa ka Tura da yoh ko 29/4 ha ka Over wa 10 chwa u wan u Shahin Alone uwa da kamai 52 na 47 bol (3x4s, 5x6s) wa u Jhon Venny uwa da kamai 27 na 64 bol (2x4s) kiwa da ya kamailang 88 Run yow pynjop ya ka Tura ha ka 24.5 Over.
Discussion about this post