Ka West Jaiñtia Hills District Cricket Association (WJDCA) da jop ko yaka West Khasi Hills DCA da 7 Wicket haka Zone 1 ka Group B yong ka Meghalaya Cricket Association’s U-19 Boys Inter District Cricket Tournament ha Umbuda, Nongpoh ynne ka sngi.
Uwa yalehke ka WJDCA, u Maremdor Sutnga da lehbha u da ka Bat waka bol wei da yoh u leh yei naam Player of the Match. Da ka bol da yoh u 4/21 heiwa ka WKH da haap lut ki Wicket ko deiwa kamai 101 hadien wa Bat nyngkong ki wei da ka Bat won da yoh u 34 Run.
Ka WKH da jop ko yaka kylla-khlem wei da jied ko wow Bat nyngkong heiwa da haap lut ki Wicket ha ki 23.1 Over na ki 32 tylli ki Over. Ka WKH da haap ko chiboon kiwa Bat khlem da yoh ki wow kamai chiboon lait na u Pynierlang Shangdier uwa da yoh u 47 Run na ki 33 bol wa kynthup ya ka 4 tylli ki 4 Run wa 4 tylli ki 6 Run.
U Maremdor da lehbha u leh na waroh kiwa kawang bol ka WJH heiwa da leh u yeini na ki 4.1 Over. U Namewanki Pakyntein won da kawang u 7 tylli ki Over wei da yoh u 4/29.
Hawa kdong ya ka thong, ka WJH da dooh smat ko 3 tylli ki Wicket tangwa da ye ki wow poi thong ha ka Over wa 12 deiwa kamai 8.58 Run chi Over.
U Maremdor da yoh u ya ki 34 Run na ki 26 bol deiwa dat leh ya 3 tylli ki 4 Run wa 3 tylli ki 6 Run deiwa yoh lok lang wa u Namewanki uwa da kamai 12 Run khlem haap. U Ewanmidao Pyrtuh won da yoh u 19 Run na ki 16 bol wei da yoh yarap ki lyngba ki 22 tylli ki Wide.
Ki yalehke mynstep toh hapyrdi ka Shillong Cricket Association A waka East Jaintia Hills DCA ha ka Zone 1 ka Group A.
Discussion about this post