Ka Meghalaya da emkaam ko sa 132 Run, tangwa dang em ko sa soo Wicket ha kti yow jop ya ka Arunachal Pradesh hadien wa kut ka sngi wa ar ha ka U-19 Cooch Behar Trophy wei deiwa haap 22 tylli ki Wicket.
Deiwa pteiñ ya ka Innings wa nyngkong da 80/4 ha Bhubaneshwar, ka Meghalaya da dooh lut ko ya ki Wicket deiwa kamai 124 heiwa da ye won wow pynhaap lut ya kiwa Bat ka Arunachal da 128 Run. Ini da booh thong ya Meghalaya 223 yow jop tangwa da dooh noh 6 Wicket deiwa kamai 91 Run hadooh wa kut ka yalehke ynne ka sngi.
U Kevin Christopher da ye u wow kamai sa 7 Run na iwa ieh u ynnin i miet yow yoh 42 heiwa da haap lut ki 6 Wicket wa sah ka Meghalaya deiwa kamai 32 Run ha ka Innings wa nyngkong.
Ka Arunachal leh da chem chitom ko da ka Bat ha ka Innings wa ar deiwa yoh 128 heiwa ha ka Innings wa nyngkong da yoh ko 218.
Ka Meghalaya da yoh ko ya ki 3 Wicket wa nyngkong ha ki 2 Over wa sdang tangwa u Ankit Solanki da wan u wow kami 64 yow pynman ya ka Arunachal wow tam ya ka 100 Run. Ka Meghalaya da pynemkaam ko du 4 ngut kiwa kawang bol ha kani ka Innings, heiwa u Purav Agarwal da yoh u 5/53, u PM Santhosh (2/18), u Manish Sharma (2/32) wa u Navin Kumar Ray (1/23).
Hawa kdong ya ka thong, ka Meghalaya da yoh ko 91 na ki 40 Over heiwa u Mrinal Das da kamai u 32, hadien wa haap u, da yoh ka Meghalaya 54/5 tangwa da kamai lang 33 Run da u Christopher wa u Rohit Yadav iwa da yoh ki na ki jan dap 20 Over.
Tangwa u Christopher da haap u ha ka Over wa khaddooh ynne deiwa kamai 16, katwa u Yadav dang neh u da 19 Run yow kit ya ka Meghalaya ha ka sngi kawa le.
