Ka South Garo Hills waka South West Khasi Hills da jop ki ha ki yalehke yong ki ha ka Inter District U-19 Women’s Cricket Tournament wa pynman da ka Meghalaya Cricket Association ynne ka sngi.
Ha Williamnagar, East Garo Hills, ka SGH da jop ko ya ka North Garo Hills da 221 Run hapoh ka Zone 2, heiwa ka Smillin N Sangma da yoh ko 5 Wicket deiwa e 3 Run. Katwa ha Nongkhrah, Ri-Bhoi, ka SWKH da jop ko ya ka East Jaiñtia Cricket Association da 148 Run.
Ka SGH hawa bat nyngkong da yoh ko 240/7 na ki 35 Over, heiwa ka Marme M Sangma da kamai ko 78 Not Out na 41 bol heiwa cha tre leh da kamai ka Dianchidora da 60 na 95.
Ka NGH hawa e yei jubab da ye ki wow kamai du 19 Run deiwa dooh lut ya ki Wicket ha ka 12.4 Over.
Ha kawi won ka yalehke, ka SWKH da Bat nyngkong ko hadien wa jop ya ka kylla khlem wei da kamai ki 236/4, deiwa yoh ka Captain Indariakor Kharwanniang 64 waka Banrikmen Lyngdoh Tongkhar 39. Tangwa da em boon da ki Run wa yoh mynkna wa kynthup ya 70 tylli ki Wides wa 34 tylli ki No Balls. Ka Mimi Chyrmang da yoh ko 2/46 da ka bol.
Ka SWKH leh da e mynkna ko 69 Run yeiwa kamai ka EJCA iwa 88 Run. Ka Balarisha Thongni (3/6), Baniashisha Lyngkhoi (3/11), Milansy Jyrwa (2/17) waka Ibajanai Wanniang (2/27) toh kiwa yoh u chim Wicket.
Mynstep, ka East Khasi Hills daw yachem ko waka West Khasi Hills ha Group A ka Zone 1, katwa ka Tura daw yachem ko waka North Garo Hills haka Zone 2.
