Ka South Garo Hills da jop ko ya waroh ki le tylli ki yalehke yow psiah cha ka Final ka Inter District U-19 Women’s Cricket Tournament wa pynman da ka Meghalaya Cricket Association hapoh ka Zone 2 ha Williamnagar, East Garo Hills.
Ka SGH da jop ko yaka EGH da 9 Wicket deiwa lehbha ka Smillin N Sangma daka bol kawa da yoh 7/9 na ki 6 Over iwa man leh iwa bha tam ha kani ka lympung.
Ka EGH da ye ko wow kamai du 25 Run hadien wa jop ko yaka kylla khlem wei da jied ko wow Bat nyngkong. Ka SGH da dooh ko du chi Wicket yow pynjop ha ka Over wa 4 deiwa kamai ka Janika R Marak 16 waka Jaylynn R Marak 7 kiwa khlem haap waroh arngut.
Ka SGH da yoh ko 6 Point na ki 3 tylli ki yalehke yow yoh nyngkong hapoh ka Zone 2.
Ha ka Group B ka Zone 1, ka Shillong Cricket Association da yoh nyngkong ko deiwa jop da 3 Run yaka South West Khasi Hills ha Nongkhrah, Ri-Bhoi.
Ka South West Khasi Hills da jop ko yaka kylla khlem wei da jied ko wow bol nyngkong heiwa ka Shillong da kamai ko 187/5 na ki 26 Over. Ka Suriti K Ray da kamai boon dooh ko da 66 Run na 49 bol chwa u chah Run Out ko.
Ka SWKH da pyn kop-kop ko yaka Shillong tangwa ym em poi thong ko deiwa yoh 184/6. Ka Indariakor Kharwanniang (29) waka Nesilin Nongsiej (28) toh kiwa kamai boon dooh.
Ka yalehke wa bood ka Zone 1 daw pynman hapyrdi ka Ri-Bhoi wa Shillong. Ka Ri-Bhoi da psiah ko lynbga ko lyngba ka Group A deiwa kheiñ ya ka Run Rate hadien waroh le tylli ki liang deilang waka West Khasi Hills wa East Khasi Hills da yoh ki mar 2 Point.
Kiwa jop daw yachem ki waka South Garo Hills haka yakhun Final kawa daw pynman ha ka 3 tarik u Wisu.
