Ka Shillong Cricket Association daw yachem ko waka South Garo Hills ha ka yakhun Final ka Inter District U-19 Women’s Cricket Tournament wa pynman da ka Meghalaya Cricket Association hadien ka yakhun wa khaddooh ka Zone 1 wa da pynman ynne ka sngi ha Nongkhrah, Ri-Bhoi.
Ka South Garo Hills toh kawa da psiah Final chwa naka Zone 2 haka 26 tarik. Ka Shillong da yoh nyngkong ko haka Group A ka Zone 1 katwa ka Ri-Bhoi naka Group B wei kini da yachem ki ynne ka sngi yow yoh u psiah Final.
Ka Ri-Bhoi da jop ko ya ka kylla khlem wei da jied ko wow kawang bol nyngkong heiwa ka Shillong da kamai ko 212/5 na ki 30 Over, heiwa ka Player-of-the-match ka Suriti K Ray da yoh ko yaka spah Run wa nyngkong kani ka Tournament deiwa yoh ko 101 na 69 bol wa kynthup ya 15 tylli ki 4 Run.
Ka Ri-Bhoi hawa kdong da ye ko wow kamai 7 Run chi Over hadooh wa chah Run Out ka Ankita Sharma kawa da kamai 54 Run. Hadien wa haap ko haka Over wa 14, ka Ri-Bhoi da haap lut ki Wicket ko deiwa kamai 150 na ki 28.4 Over. Na kiwa kawang bol, ka Jayshree Singh da lehbha dooh ko deiwa yoh 4/30.
Ya ka Final daw pynman ha ka 3 tarik ha Williamnagar, East Garo Hills i thaw wa da pynman ya ki yalehke ka Zone 2.
