Ynne ka sngi ha ka yalang paidbah u Nehemayah Tyngkan u kyrtong ka Congress na Mowkaiaw wa da pynman ha ka chnong Iooksi, neiliang u Working President ka MPCC, u PN Syiem da ong u wa ka sorkar MDA toh ka sorkar ki High Level heiwa da pait du ya kiwa yoh katwa kiwa dooh won dang dooh kat dang lai ki por.
Chooh chooh da ong u wa na Secretariat heithaw wow mih ki aiñ neibynta ki paidbah tangwa da mih pathan ki aiñ du ya kiwa mahajon.
U PN Syiem da ong u wa heipor wa dooh bor ki waheh chnong, u Dr. Mukul Sangma da wanrah u ya ka Ordinance wei oo won da booddien wei da kreh chitom u yeini hadooh wa im biang i bor ki waheh chnong.
Da ong u wa kani ka kynti emkaam ya ki bru ki waheh ki dap chynrang wow yada ya ka ri wa ka jylla khamtam ya ka jaitbru wei u 2023 toh i por wow jied ya kiwa mihkhmat wei wow yada ya ka jaitbru ki Elaka wa ki chnong ki thaw.
Da ong u leh wa lada ym yoh ya kiwa mihkhmat wa skem kiwa raikut tæ da kut ka jaitbru yong i wei khamtam i mantre yong i ya ki chnong ki thaw yong i hi.
Heijooh i por da ong u wa ymtoh u jied ya ka BJP neibhah wa man ko ka Party ka wow wanrah ya ki aiñ wa ktah ya ka ri wa ka jaitbru ka Ri-loom Khasi wa Ri-loom Jaiñtia heiwa da wanrah ko ya ki aiñ kam ka CAA, ka Uniform Civil Code wa kiwi kiwi katwa ka Congress u yakhun ko wow pynneh yei mantre yong ka jaitbru.
Chooh chooh da ong u wa kani ka sorkar BJP wa katni ha ka sorkar pyrdi kamjooh ha ka sorkar jylla ym em u kheiñ bru de ko ya ki paidbah neibhah wa da ku dor ware i mar baam mar dih wa i phñiang kari katni iwa da ktah ya ki paidbah waroh.
Da pynkut u deiwa kyntu ya ki paidbah ka Mowkaiaw Constituency wow jied ya u Nehemayah Tyngkan kam u kyrtong ka Congress khnang wow ye biang u wanrah yei chaniah ha i kaam chakri paidbah hapoh ka Constituency wa ka ri wa ka jaitbru waroh kawi.
