Ka East Jaintia Cricket Association da jop ko yaka All Jaintia Cricket Association da 3 Wicket ha ka U-23 Boys Inter District Cricket Tournament ka Meghalaya Cricket Association wa pynman ha Nongkhrah, Ri-Bhoi ynne ka sngi.
Kani toh ka yalehke ka Group-A ka Zone 1 heiwa ka AJCA da jop ko yaka kylla khlem wei da jied ko wow Bat nyngkong heiwa da dooh lut ko ya ki Wicket deiwa kamai 128 na ki 28.4 Over.
U Dawao Passah (36) wa u Dharkison Pariat (31) toh kiwa da lehbha da ka Bat yaka AJCA katwa u Man-of-the-match, u Arjun Lama da ka bol da yoh u 6/19 ha ki 8.4 Over. U Dev Rai (2/34), u Peterson Sangma (1/20) wa u Dipok Das (1/35) toh kiwi kiwa da yoh u pynhaap Wicket yaka EJCA.
Ka EJCA hawa kdong yei thong ym em yoh ko deiwa suk heiwa u Saunihi Patwet da ka bol da yoh u 4/33 na ki 10 Over heiwa ha iwi i por ka EJCA da yoh ko 30/5 wei da yoo lakam u rem ko tangwa u Dev Rai (44) wa u Goreyoung Kam (35 Not Out) da kamai lang ki 76 Run neibynta ka Wicket wa 6.
Hadien wa haap u Rai, u Kam da pyntikna u wa ka EJCA poi ko cha ka thong ha ka 26.2 Over deiwa sah sa 3 Wicket ha kti. Kiwi de kiwa yoh Wicket ya ka AJCA toh u Defender Dhar (1/18), u Chwamiki Ryngkhlem (1/21) wa u Dawao Passah (1/23).
Mynstep ha ka Group B, ka East Khasi Hills daw yachem ko waka West Khasi Hills.
