Ka U-23 Boys Inter District Cricket Tournament wa pynman da ka Meghalaya Cricket Association, da sdang ya ka ynnin da sngi da i jop wa suk iwa da 9 Wicket ya ka Shillong Cricket Association (A) pyrchah ya ka East Jaintia Cricket Association.
Ya ka yalehke da pynman ha Nongkhrah, Ri-Bhoi, heiwa ka EJCA da jop ko ya ka kylla khlem wei da jied ko wow Bat nyngkong heiwa da kamai ki 109/10 na ki 29.5 Over. U Dev Rai (37) wa u Dencil Manar (22) toh kiwa da kamai boon ya ka EJCA. U Ayush Rabha da yoh u 3/34, wa mar ar Wicket ya u PM Santhosh (2/8), Jaskirat (2/8) wa Ankit Kumar (2/12) wa chi Wicket ya u Aaron AR Nongrum uwa da yoh 1/13 na ka SCA(A).
Ka SCA (A) da dooh smat ko ya uwi u Wicket tangwa da poi thong ki ha ka Over wa 11.2 deiwa kamai aw jan 10 Run chi Over.
U Player-of-the-match, u Kevin Christopher da kamai u 59 Run na 33 bol deiwa dat 10 tylli ki 4 Run katwa u Mrityunjay Bharali da yoh u 35 Not Out na 27 bol.
Myntu, ka Ri-Bhoi daw yachem ko waka West Khasi Hills.
Kiwa yalehke ha kani ka Tournament da bhah ya ki ha ar tylli ki Zone. Ha Zone 1 da em 8 tylli ki liang heiwa ha Group A da em ka SCA (A), SCA (B), East Jaintia CA waka All Jaintia CA katwa ha Group B da em ka Ri-Bhoi, South West Khasi Hills, West Khasi Hills wa East Khasi Hills.
Ha ka Zone 2 da em du kawi ka Group wa emlang ka Tura District CA, North Garo Hills, East Garo Hills wa South Garo Hills. Ha kani, ki yalehke daw pynman ha Mendipathar Mini Stadium. Wei daw sdang ka yalehke ki nadooh ka 11 tarik uni u bnai.
