Ka Jaylynn Marak da yaleh ko ya ka yalehke wa bha dooh yong ka deiwa dat 96 Run da ka bat wei da yoh ko 6 Wicket da ka bol ya ka South Garo Hills pyrchah ya ka Tura District Cricket Association ha ka Zone 2 ka U-23 Women’s Inter District Cricket Tournament ha Nongalbibra, South Garo Hills ynne ka sngi.
Hadien wa jop ya ka kylla khlem, ka SGH da jied ko wow bat nyngkong wei da kamai ko 177/5 na ki 35 Over, heiwa ka Jaylynn da yoh ko 16 tylli ki 4 Run yow kamai 96 na 107 bol. Ka Tura da pyemkaam ko 8 ngut kiwa kawang bol heiwa da lehbha dooh ka Preangchi kawa yoh 2/27.
Ka Tura da ye ko wow bat 21 Over heiwa da haap lut ki deiwa kamai 86 Run yow pynjop ya ka SGH da 91 Run. Ka Kamchira da kamai boon dooh ko deiwa yoh 21 Run, heiwa ka Jaylynn da pynhaap ko ya kiwa boon deiwa yoh 6/15 katwa ka Kim D Shira da yoh ko 2/31.
Ka South Garo Hills mynstep daw yachem ko waka North Garo Hills. Katwa ka Semifinal wa nyngkong ka Zone 1 daw pynman mynstep ha Nongstoin hapyrdi ka East Khasi Hills wa Shillong CA.
