U Alok Sing toh uwa yahkhmat ka ABVP | U tba kti man ko kawa bakla: Hek

U Montri ka sorkar jylla uwa man u MLA ka Bharatiya Janata Party (BJP) na Pynthorumkhrah, u Alexander Laloo Hek da ong u wow wanrah yei rukom pyrkhat yong kawon kawon ka niam hapoh kawon kawon ka skurbah næ ha ki thaw puræ toh iwa bakla, neibhah ka skurbah næ ki thaw puræ toh u man bait ki ka bynta ya waroh ki khynroo khyllood wa waroh kiwa sikai.

Ini i ong u Hek toh hawa kylli hajrong i jia ha North Eastern Hills University (NEHU), wei hadien wa bna wa u Asst. Professor, u Alok Singh toh uwa yahkhmat ka Akhil Bharatiya Vidyarthi Parishad (ABVP).

Katkam ki dur kiwa da poor ha ki rynsan Social Media da mih wa uni u Asst. Professor ha ka Subject Hindi uwa da chah dat ha NEHU, toh uwa yahkhmat ka Akhil Bharatiya Vidyarthi Parishad (ABVP) kawa man ka seiñ khynroo yong ka seiñ ki Hindu ka Rashtriya Swayamsevak Sangh (RSS), wei da pynbaad leh wa u Singh da pyrchang u wow wanrah yei rukom pyrkhat yong ka ABVP wa RSS ha NEHU.

Hawa kylli, u Hek da ong u wa ym ye wow wanrah yei thmu yong kawon kawon ka seiñ niam hapoh ka thaw puræ.

“Ya itæ ym ye wow yoo dei khmat wei ym ye wow ong iyi iyi. Ym ye i u wanrah ya kam kitæ ki yumut næ ki thmu yong kawon kawon ka seiñ næ kawon kawon ka niam hapoh ki thaw puræ,” da ong u Hek hawa klam ynne ka sngi.

Hawa pynsñiaw wa ha Meghalaya em chiboon ki skur niam wa kynthup ya ki skur Christan, Hindu wa Muslim, u MLA ka BJP da ong wa ym jooh yoo wa wanrah ya ka niam ha ki thaw puræ.

“Ka skur toh u man bait ka skur, ka College toh u man bait ka College wei ka skurbah toh u man bait ka skurbah wei ymtoh wow wanrah ya kawon kawon ka niam ha ka thaw puræ ki khynroo khyllood,” da ong u.

Related posts

Iñ iwi i dukan wa em ha pchem ka Jowai Civil Hospital

October 20, 2025

Lada ym ye u pynbait ya u pood Assam-Meghalaya ham khut yaklam yasuk ya ka HNLC

October 20, 2025

Heijooh i por u Hek da pynsñiaw u yei sñiawsih wow yoo wa uwa sikai da chah tba kti u ha kiwa lai puræ neibhah wa ktah ko yei ya sñiaw yonglang.

“Hao em ki kynrum kynram ha NEHU, tangwa man ko iwa sñiawsih wa kiwa lai puræ tba kti ki ya uwa sikai, wei ktah ko leh yei ya sñiaw yonglang yong i kiwa da heh da san wei kamjooh ki khynroo khyllood. I ym em hok i wow tba kti lada ym em kawon kawon ka daw kawa ye wow pynsñiawsih ya ka imlang sahlang næ ya ka jaitbru. Tangwa wow ong wow tba kti khlem da em ka daw wa biang man ko kayi kayi kawa bakla,” da ong u Hek.