Shillong: Ka chnat i chait i khiah ka jylla ynne ka sngi da pynbna ko wa u bru na Umsamlem, Ri-Bhoi District ym em chah ktah u ha u COVID-19.
Hawa yaklam wa kiwa pathai khubor ynne i janmiet, u Director ka Health Services (DHS) ka jylla, u Dr. Aman War da pynche u wa u bru wa chah sumaar ha Dr. H Gordon Robert Hospital na Umsamlem ya uwa waroh chi kattu da kheiñ wa chah ktah u ha uni u khñiang, ymtoh iwa sakhiat khamtam hadien ki Test wa boon.
U Dr. War da pyntip u leh wa dadep phah Test ya waroh kiwa yajan wa uni u bru wei da chem wa ym em chah ktah ki nadooh kiwa em ha Ri-Bhoi, West Khasi Hills wa East Khasi Hills.
Da pynrap u leh wa da phah leh biang ya ka Rapid Test wa ka RT-PCR hadien wa phyllu pyrkhat wa ki Doctor ka Robert Hospital, heiwa da rai wow phah pait bniah wei ha ka sngi wa ynñiaw da chim biang ya ki nongmuna (Sample) wow leh ya ka Rapid Test da man Negative ko wei hadien wa leh Test biang hadien 24 kynta da chem wa man Negative biang.
U Dr. War da pyntip u wa hadien ini, ka chnat da rai ko wa ini waroh i mih khubor da man i iwa bakla.
