U chah biang ka skur ya ki chi payu wa em HIV

Heiyatoh wa i chah beh ki ar ngut kiwa chi payu kiwa em HIV na kawi ka skur wa em ha Ummulong kawa tip kam ka Green Hills Christian Academy School, neiliang ka seiñ Meghalaya State Network of Positive People deilang waka chnat yong ka wa em ha ri-loom Jaiñtia kawa tip kam ka Jaintia Network of Positive People (kiwa man kam ki seiñ kiwa em ya u khñiang HIV), kiwa pait yei bha i miat kiwa chah ktah ha u HIV nadooh i chah leh chiliang wei chah pyndooh yei hok manbru iwa da e hapoh ka riti synchaar wei katkam ka aiñ wa yada ya kiwa em HIV, ynne da lai hiar ki cha ka Ummulong Beat House dei thmu wow ujor da ka FIR pyrchah ya kani ka skur.

Da jia wa ha ini i por da emlang leh u Principal ka skur, u P. Shylla hapoh ka Beat House heiwa waroh arliang da yoh ki wow yaklam heiwa neiliang ki pulit leh da pynche ki heiyatoh waka aiñ ha kam ini wa jia.

Neiliang u Barry Leslie Kharmalki, uwa man kam u EM ka Meghalaya State Network of Positive People da ong u wa ki wan ki wow e FIR yow yoh kini ki chi payu yei hok yong ki wow lai skur iwa da man i hok yong ki katkam ka aiñ wei ym ye wow pyndooh yeini.

Kamtæ hadien wa da yaklam ya sñiawthooh da ya soi ya ka soskular heiwa u Principal ka skur da ong u wa neidaw wym tip bniah heiyatoh wa ki kaam wa yatoh wa i kjut HIV/AIDS da jia ini waroh wei da pynbna u wa kini ki ar ngut ki chi payu u chah biang ya ki wow wan skur ki wei ka skur hi u pait ko yei puræ puthi yong ki hadooh wa pyndep ki ya ka Matriculation.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Neiliang ka Meghalaya State Network of Positive People da pdiang ko yeini wei ym em de e ya ka FIR wei da kular ki leh wow wan cha ka skur yow pyman ya ka pynsñiawthooh chaphang i HIV/AIDS yow lait nei sñiawthooh bakla wei tieñsar ki bei ki pa ki khynnah kamjooh ka chnong hi waroh kawi.

Hawa yoh u yaklam wa u Barry da ong u wa dang emkaam bha i pynsñiawthooh paidbah neibhah ya kini ki khynnah da phah ya ki da u Principal wow dam chwa u wan skur wei wow chong dih dawai ha yung wei manda chait ki yow wan skur biang ki wei ini pynyoo ko wa dang em hi ki bru ki wym pu sñiawthooh chaphang uni u khñiang kamjooh ki dawai wa em yow ye kiwa chah ktah wow im kamwa man hi kiwi.

Puræ leh: Chah beh ki chi payu na iwi i skur wa em ha Ummulong neidaw wa em HIV ki