Shillong: Kam chibynta wow pynbait yei rukom wai ka Iewduh, ka Deputy Commissioner, East Khasi Hills District da pynmih hukum ko ynne ka 20 tarik yow pyntip wa ki 1245 tylli ki dukan u wai ki le sien chi tayaw deiwa wai 623 tylli ki dukan ha ka chi sngi nadooh 8:00 AM hadooh 6:00 PM. Deiwa bood thij yeiwa da pynbait u Syiem ka Hima Mylliem kamjooh wow bood ya ki kyndon (Standard Operating Procedures) wa pynmih da ka sorkar kamjooh waroh kiwa da phah bood daka chnat Health and Family Welfare Department khlem pep.
Ka hukum da phah ko leh ya u Syiem ka Hima Mylliem wow pyntikna u wa ki tre dukan bood ki ya waroh ki kyndon khamtam yaka Social Distancing.
Ka Deputy Commissioner da phah ko leh ya kiwa chongdai dukan wow bood ki yaka Social Distancing deiwa yajngai ym duna ya 6 Feet, ym toh wow ya psiah khynnai ha iwi i dukan lane i thaw, wow deiñ Mask iwa ym hoi u dam wei ya ki wym bood ya ini daw chah pynchitom ki hadooh wa chah khang i dukan.
Toh u man leh kiwa lehkhooid, u sait ya ki kti, toh u booh leh ya ki Hand Sanitizers da ki tre dukan ha ki thaw psiah wa ki thaw mih ki dukan. U krehlang wa u Syiem ka Hima Mylliem deilang wa ki District Police yow pyntikna wa bood ya ki kyndon kamjooh ki hukum ka Night Curfew kamjooh ki kyndon ka 144 CrPC kiwa da pynbna ynne hi ka sngi.
Ya kiwa leh pyrchah daw chah pynchitom ki katkam ka aiñ wei daw chah khang i dukan.
