U DC ka East Jaiñtia Hills ha ka hukum wa pynmih ynne ha kani ka 11 tarik kam chibynta wow e laad ya ki bru wow thied ya kiwa emkaam ki, da pynbna u wa daw chah u wai ki dukan wa dai ya ki mar wa emkaam ha ki le sngi, kitæ ha ka 14-06-21 (Monday), 16-06-21 (Wednesday) wa ha ka 18-06-21 (Friday).
Kini ki dukan toh kiwa em ha ki yaw ka Khliehriat East wa West, waroh ka Ladrymbai, Umpleng, Chiehruphi, Lumshnong, Sohkymphor, Sookilo, Saipung, Semasi, Jalaphet, Rymbai, Wapung, Sutnga, Bataw wa Umkiang nadooh 9:00 waje i step hadooh 3:00 waje i janmiet katwa ki dukan wa em ha ki dong daw pynbait da ki Dorbar Chnong wa ki Market Committee yei rukom wai ki.
50% na ki dukan wa dai mar wa emkaam, ki dukan Hardware, Electrical wa 20% kiwi ki dukan ki wym toh wa dai ya ki marbaam mardih kam ki dukan dai that, chna phone, kiwa dai tiar kari u wai ki deiwa pynbait da ki dorbar chnong lane ki Market Committee.
Ka hukum da khang ko leh yei lai na kawi ka District cha kawi, ym chah ya ki bru wow mih ki cha lait khlem i daw wa biang, ki kari wa lai khlem Pass daw chah pynchitom ki wei kiwon kiwon kiwa leh pyrchah pyrchah ya ka hukum ye ki wow chah kem.
Ki dukan wa em chi thaw ha ki dong ki chnong daw chah u wai ki nadooh 2:00 waje i sngi hadooh 6:00 waje i miet deiwa bood thij ya ki kyndon wei i rukom wai toh deiwa pynbait ka Dorbar Chnong lane ki VDP.
I krehkaam chna yung ki bru samen wa kamjooh ki yong sorkar deiwa ym emkaam wow wanrah bru na kiwi ki chnong toh iwa da chah wow pteiñ ya ki kaam chna.
Ym pu chah wow pynman ya kiwon kiwon ki yalang paidbah.
Ki yung krehkaam ka sorkar pyrdi toh u wai ki katkam ka hukum Home (Political) Department katwa ki yong ka sorkar jylla u wai ki katkam ka hukum ka Personnel & AR(A) Department.
Waroh ki Post Office u wai ki ha ka 14-06-21, 16-06-21 wa ha ka 18-06-21 deiwa pynduna bru wakreh wei toh u khang ki chwa ka 3:00 waje i sngi.
Ki Bank u chah u wai ki Monday hadooh ka Friday deiwa pynduna bru wakreh.
Du kitu kiwa yoh bor wow leh Home Delivery kiwa ye wow leh ya ini i kaam.
Ki yalang hawa em wa yap bru toh u em du 20 ngut ki bru.
Kani ka hukum ym krehkaam ko ya kiwa kreh ha i chait i khiah, kiwa emkaam dawai jhan wa kiwa lai e dawai tika heiwa kiwa chim tika emkaam wow pynyoo ki ya ka COWIN Registration wa i Slot Booking.
Da chah leh wow kit ya ki dawai, ki mar, ki mar wa emkaam, i lai i wan ki wakreh pulit, Security & Armed Forces, Civil Defence & Home Guards, Fire & Emergency Services, Electricity, PHE, Public Distribution System (PDS), PWD, Information & Public Relations wa Telecommunication Services.
Chooh chooh da chah ya kiwa pathai khubor, Petrol Pump, LPG, ki warep ha ki thaw palat sor (wa kynthup ya i rep pathi rep kwai), ka MGNREGA, kiwa psan mrad wa kiwi ki kaam wa yatoh wa i psan mrad.
