Jowai: Ka seiñ All Jaiñtia Muster Roll Workers & Labour Union, Jowai deilang wa ka All Jaiñtia Mid day Meal Workers Union, Jowai da kyrchaan wei daw embynta lang ki waka One Citizen, One Tree; i thmu wa kyntang u montri ranbah ka jylla u Conrad K Sangma wow thung chiboon tylli dieñ ha ka bei rymaw.
Ki waroh ar tylli ki seiñ da chim ya ka rai wa ki wakreh Muster Roll ha waroh ki chnat sorkar jylla wa ki Mid day Meal Cook cum Helper kiwa chet ja ha waroh ki skur ha ri-loom Jaiñtia u thung ki uwi u dien ha ki thaw krehkaam yong ki næ hajan ki kamra chet ja ha ki skur ka wow sdang nadooh ka 05-06-2019 kawa man ka sngi kynmoo wei wow sumaar ya ka bei rymaw.
Kamtæ neiliang u President ka All Jaiñtia Muster Roll Worker & Labour Union, Jowai da kyrpaad u ya waroh kiwa kreh Muster Roll ha ki chnat sorkar wa kiwa chet ja sngi ha ki skur ha ri-loom Jaiñtia wow em ki i kitkhlieh neibynta kani ka sngi deiwa chimkhia yaka soodong sookun deiwa pyrkhat leh ya ka mynstep ka man kawi ki khon ki kti.
Da kyrpaad leh ya waroh kiwa chong chnong ka Ri-loom Jaiñtia wa ka jylla Meghalaya wow sñiawbha wow ksoh kti lang wa i thmu wa kyntang u Chief Minister wow lai chim hi ya ki tre dieñ wei wow thung wow sumaar ya kitu ki dieñ wa thung phi hadooh wow heh ki, khnang wow yoh ya ka soodong sookun kawa chait wa khiah ya waroh ka pateiñ ka wow wan hadien.
Ini toh katkam wa pyntip u K. L Pariat, President ka All Jaiñtia Muster Roll Worker & Labour Union, Jowai.
Discussion about this post