Ka All Jaiñtia Muster Roll Workers & Labour Union (AJMRWLU) ha ka 16 tarik da yachem ko ya u D.P. Wahlang ha kamra krehkaam yong oo uwa man kam u Additional Chief Secretary yong ka sorkar jylla uwa pait ya ka chnat puræ puthi.
Ya ini i yachem da yahkhmat da ka Dayoo Iakai kawa man kam ka President ka AJMRWLU, u Dapherborn N Suchiang uwa man kam u General Secretary ka AJMRWLU wa u Jerry Suting uwa man u President ka All Jaiñtia Mid Day Meal Workers Union.
I yachem ha kani ka sngi toh hajrong i eh i khoo wa chem ki wakreh chipor namo ki Casual wa ki Muster Roll heiyatoh wa i pynku ya ka nong (Honorarium) yong kiwa chet ja-sngi Mid Day Meal Cook wa kiwa yarap ya ki namo ki Helper kiwa em hapoh ka chnat puræ puthi.
Hajrong ini i yachem neiliang u D.P. Wahlang da ong u daw yarap u wow yoh ki wakreh yei hok wei u chimkhia u wow leh yeiwa emkaam khnang wow myntoi ki wakreh mylla sngi deiwa salonsar.
Heiyatoh wa i dawa yong ki wakreh Mid Day Meal leh da ong u wa kiwa chet ja-sngi leh daw yoh u e ya i rai wa biang wa paka ya ki wei daw leh u neibynta wow imlang waroh.
