U DC warim ka West Jaiñtia Hills waka West Khasi Hills District u Arun Kumar Kembhavi katkam ka hukum wa da pynmih ynnin ka 6 tarik da ka chnat Department of Personnel & Training (DoP&T) ka sorkar pyrdi da thung noh ya oo kam u Deputy Secretary ka D/o Drinking Water and Sanitation, Delhi.
Ka hukum wa da phah da u Deputy Secretary ka sorkar India cha u Chief Secretary ka Assam wa Meghalaya da ong wa ya ini da leh katkam ka Central Staffing Scheme neibynta soo snem nadooh wa chimkti ya ini i kaam næ lada pynmih da kiwi tawon ki hukum.
Kamtæ da kyntu wow pynlait noh ya u Kembhavi na kiwon kiwon ki kaam wa da ksoh u ha ka jylla.
Da kdaw leh wa katkam ka rai ka DoP&T ha ka 17 Naisaphra 2005, uwon uwon u sahep toh u chimkti u ya i kaam hapoh le tayaw nadooh wa pynmih ya ka hukum wei lada ymye u leh kamtæ daw chah pyndooh noh u yei em ha ka Central Staffing Scheme.
Kam wow pynknymoo wa hadien wa kyrriah ya u Kembhavi kam u DC ka West Khasi Hills, da ksoh u kam u Registrar ka Cooperative Society dep neitæ da man u leh kam u Commissioner of Taxes, da pait u leh ya ka chnat Mining & Geology wei da dep man u leh kam u CMD ka MeECL.
U Kembhavi toh u IAS ka Assam-Meghalaya Cadre yong u snem 2011.
