U Hamletson Dohling, Montri ka chnat C&RD ynne da wan booh mooyurim u wow chna pynthymme noh ya ka yung krehkaam ka Thadlaskein C&RD Block hei lut wa kamwa T. 3 klur.
Ha ka yalang wa da pynman ha rood ka nan Thadlaskeiñ, da emlang leh u Montri ka chnat Tourism kamjooh, u Sniawbhalang Dhar, u MLA ka Jowai, u Wailadmiki Shylla, u MDC ka Mukhla Wahiajer, u Ailad Bhoi deilang u CEM ka JHADC, u Thombor Shiwat wa kiwi de ki MDC, u DC ka West Jaiñtia Hills wa kiwi de ki heh sorkar.
U Hamlet hawa e yei klam da ong u wa em boon ki yung krehkaam ki Block kiwa da ieh khlem da pynchna thymme hadooh 40 snem, kamtæ kani ka sorkar wa katni da booh bhah ko ka poisa kawa T. 120 klur yow chna pynthymme noh ya 40 tylli ki yung krehkaam ki Block kiwa katni da booh mooyurim wow sdang noh yei kreh wei ya kani ha Thadlaskein daw pynchna hei lut wa kamwa T. 3 klur.
Da pyntip u leh wa ki Block wa thymme wa dang pynkha da em ki 9 tylli.
Da e yaroh u leh ya u MLA ka Jowai, u Wailadmiki Shylla yei khlan u wow booddien yow pyntikna wa kani ka Block ym dooh ko yeini.
Da ong u wa ki yung krehkaam ki Block toh kiwa emkaam bha hawa pynkrehkaam ya ki Scheme sorkar khamtam ki kreh 100 sngi namo ka MGNREGS kawa da wanrah myntoi bha ha ki chong ki thaw wei kamjooh leh ka Block leh yarap bha ko heiwa seiñ ya ki SHG kiwa da boon tylli bha katni hapoh ka jylla.
