Kiwa sikai hapoh ka lama ka Meghalaya Government Lower Primary School Contractual Teachers Association (MGLPSCTSA) da kyntait ki wow yachem ya ki bor sorkar ynne ka sngi, tangwa da rai ki wow chong bait ha thaw psiah ka Secretariat hadooh wa rai ka sorkar wow e dei thoh wa da thung kreh biang ya ki.
U Wabu Birbor Riangtem da ong u wa la man katwa man ymbien de ki wow yachem ya u Montri ka chnat puræ puthi ka jylla, u Lahkmen Rymbui uwa da klam pynchrai ya kiwa sikai rap nachwa. Da ong u wa ym myntoi wow lai yaklam khlem mih soh wei da kylli u leh neiyi i daw wa pynbiej ya kiwa sikai kamni kamtai.
Da ong u wa lada kwah ka sorkar wow jai jai wei kiwa sikai u sangeh noh ki yei yakhih, ka sorkar da toh u e ko da ka chithi wa kiwa sikai u lai hikai biang ki ha skur.
Hajrong i khut u Chief Secretary leh, neiliang u Wabu Birbor da kyntait u wow yaklam, deiwa ong wa lada kwah u CS u yaklam da toh u wan u ha i thaw wa pynman yakhih ki ha thaw psiah ka Secretariat.
Da ong u leh wa kiwa sikai dawa ki wow chah thung kreh biang wei lada em iwon iwon i tyrwa na ka sorkar wow e da kiwi ki laad yarap, kiwa sikai daw phyllu yumut ki para ki tangwa ym bien ki yei chah pynbiej.
Kam wow kdaw heini wa neiliang ki bor pynlai District wa ki Magistrate da lai ki wow pynsiaw cha kiwa sikai wa u Chief Secretary wa u Chief Secretary, u DP Wahlang da khut u wow yaklam ya ki tangwa neiliang yong kiwa sikai da kyntait ki tang wow lai leh.
