U chong bichaar ka Supreme Court yei pynkrehkaam ILP ha Manipur

Ka Supreme Court ka India ynne ka sngi da phah Notice ko wow chong bichaar noh ya ka mukotduma pyrchah ya ka rukom pynkrehkaam ya ka Inner Line Permit (ILP) hapoh ka jylla Manipur.

Ka miej chong bichaar (Bench) wa kynthup ya u Justice Abdul Nazeer wa u Justice Krishna Murari da chong bichaar ki ya ka mukotduma (Writ Petition) kawa da dawa wow pyndam noh ya ka Manipur Inner Line Permit Guidelines 2019.

Kiwa yaleh mukotduma wa mihkhmat da u Fuzail Ahmad Ayyubi, u Ibad Mushtaq waka Kanishka Prasad kam ki muktiar ka seiñ Amra Bangalee kiwa da dawa waka Adaptation of Laws (Amendment) Order 2019 yow pynkrehkaam ya ki kyndon ka Bengal Eastern Frontier Regulations 1873 hapoh ka jylla Manipur man ko pyllat yei bor wa da pynkup hapoh ka Article 14,15,19 wa 21 ka riti synchaar namo ka Constitution ka ri.

Kam wow pynkynmoo wa ka Inner Line Permit toh kawa da pynkrehkaam  hapoh ka Manipur ha u snem 2019 hadien wa pynkrehkaam ya ka aiñ Citizenship Amendment Act (CAA) heiwa ki thaw wa haap hapoh ka ILP da lait ki naka aiñ CAA.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka mukotduma kawa da e ha ka Supreme Court da yaleh pyrchah ko ya ka hukum 1950 Order waka 2019 Order wow pynkrehkaam ya ka Bengal Eastern Frontier Regulations (BEFR) hapoh ka jylla Manipur deiwa ong wa kini da tyngkheiñ ki yei hok wa da e cha waroh kiwa chong chnong namo ki Fundamental Rights wa da e hapoh ki Article 14,15,19 wa 21 neibhah da e bor ya ka jylla wow khang yei psiah i mih ki wym toh ki tre jylla wa kiwa chong chnong ka Manipur.

Chooh chooh kiwa yaleh mukotduma da ong ki waka ILP man ko leh pyrchah yei pynyajan pynyajooh ha ka imlang sahlang ka ri, i wanrah ya ka roi ka paar wa kiwi de kiwa da pynkrehkaam hapoh ka ri lait na ki thaw wa em ka ILP najrong wa ktah ko leh ya ki kaam uiñke suwari wa kiwi de ki kaam wa ye bha u pynmih pisa hapoh ka jylla.

Da kdaw leh wa ki pharæng namo ki British da pynkrehkaam ki ya ka BEFR 1873 toh yow yoh ki du ya ki samen ka khayi pateiñ yow khang ya ki nong India wow ya khayi ki wa ki jaitbru ri-loom hapoh ki thaw wa pynkrehkaam ya ka BEFR kamtæ katni hadien wa da yoh yei laitlooid leh dang pynkrehkaam ya ka deiwa e daw wow yada ya ki jaitbru ri-loom.

Da ong leh wa i ktah ka ILP hapoh ka jylla Manipur toh wa kiwon kiwon ki wym toh kiwa chong chnong ka jylla da chah wow psiah kamjooh wow khayi pateiñ du deiwa yoh ya ka Inner Line Permit.

Kani ka mukotduma toh kawa da yaleh pyrchah ya ka sorkar India wa kiwi de.