U chong bichaar khaddooh ka NGT ya ka Wah Myntdu ha ka 22 tarik | Da khut ya ki paidbah wow wan e buit

Ka seiñ Khooid Ya Ka Wah Myntdu hapoh i yahkhmat u Khroo Lamsalanki Pariat kam u President deilang wa kiwi won ki bru waheh toh kawi na ka seiñ kawa da lai luti kyrpang hajrong kammon u pynneh pynsah wei yada ya ka Wah Myntdu nei chah ktah wa boon rukom neibhah toh ka kawa psa umbaam umdih ya ki paidbah wa chong chnong ka sor Jowai.

Kamtæ ha u snem 2024 neidaw wa da joor ware i chah ktah ka Wah Myntdu wei dapoi da ka um ktieh cha man ki thlu yung neidaw wa chna ya u sarok uwa pynyabi na Treiongriang cha Khliehryrchi, wei hajrong ini ka seiñ ha deilang i mynjurlang ki paidbah wa chong chnong da lai ujor syndon ko cha ka Meghalaya High Court kamjooh leh cha ka National Green Tribunal (NGT).

Hei lailuti ka seiñ neiliang ka Meghalaya High Court da pynkut noh ko ya ka mukotduma neidaw wa ka NGT leh da chimkti ko u lai chakhmat ya kani hi ka jooh ka kaam wei khamtam wa man leh ka mat wa kyrpang yong ka NGT hi.

Hajrong kani ka mat, ynne ka sngi u Khroo Lamsalanki Pariat khana u wa neiliang ka NGT leh dadep chong bichaar ko la kamwa soo san sien haroh wei hei bichaar yong ka pyrchah ya ka sorkar jylla kamjooh ya u DC ka West Jaiñtia, ya ka Jowai Municipal Board, ya u Executive Engineer PWD Jowai Central wa u Contractor; da poi leh u pood wa ka NGT da wan hiar lai pait ko ya ka Wah Myntdu lyngba ka Joint Committee ka Central Pollution Control Board, ka Ministry of Forest Environment & Climate Change Regional Office Shillong.

Related posts

Chah ksih ka Autorickshaw hapyrdi ki ar tylli ki Bus hadooh wa sti khnap

August 6, 2025

Lai thooh u CEM ka KHADC yei bhah ka Council na ka sorkar

August 6, 2025

Kamtæ i chong bichaar wa khaddooh ka NGT heiyatoh wa ka Wah Myntdu u man ko haka 22 tarik uni u bnai.

Heiyatoh wa ini neiliang ka seiñ da khut kyntu ko ya ki paidbah wa chong chnong kiwa em soodong ka Wah Myntdu wow wan ki cha ka yalang paidbah ka wow man  ha ka 9 tarik uni u bnai ha Yungwalieh ka Chiliangraij, Jowai heipor 1:00 waje i sngi, wei ka seiñ da khut kyrpang haroh ko nadooh ki Dolloi wa haap hapoh u pood u ang wa lai luti ka Wah Myntdu, ki waheh chnong, kiwa yahkhmat Seiñraij waphær waphær wa kiwi won ki bru wa rap bna naam wow ya wan e buit e yumutlang wei wow ya pyrkhat ha katai ka sngi neibynta i chong bichaar wa khaddooh ka NGT ka wow man ha ka 22 tarik.

“Kamwa ya ka Wah Umkhrah ha Shillong ka sorkar da yaleh ko u pynbha pynmiat deiwa pynlut da ki phaw klur, wei ileh ya ka Wah Myntdu ym ye mo u leh kamjooh khamtam wa toh ka wah wa e i im ya u paidbah uwa pynemkaam umdih na ka,” da ong u K.L. Pariat.

Ha kani ka sngi neiliang ki ar ngut ki bru waheh wa kynthup ya u J.M. Pohsngap wa u Rupaia Lamar leh da kyntu joor ki ya ki paidbah kiwa em i mynsien sñiawkhia hajrong i chah thombor ka wah Myntdu wow sñiawbha ki u wan mih khnang cha katai ka yalang.