Ha ka yalang wa da khut pynman da ka seiñ “Khooid Ya Ka Wah Myntdu” ha ka 3 tarik uni u bnai hapoh i yahkhmat u President yong ka, u K.L. Pariat neibynta u yaklam yachem yumut hajrong i chah ktah ka Wah Myntdu, da wan wow chimbynta da kiwa boon ki kynthai wa chynrang wa kynthup nadooh ki waheh chnong waphær waphær, ki warep, kiwa chong chnong ha talawiar ka Myntdu, ki bru waheh wasian wa kiwi ha ka yalang wa da man ha yungwalieh ka Chilliangraij.
Napyrdi kiwa chimbynta ha kani ka yalang da pachat ki jar jiar i yumut, wei em leh kiwa ong i daw wa sih wa chah ktah ka Myntdu toh nei leh hi ki bru wa chong wa sah ha soodong yong ka, wa kynthup nadooh i pynkai yei jakhlia wa mih na ki yung ki sem, i noh pynsih ki bru yei jhep, ki Plastic wa kamjooh neiwa chna sarok harood ka wah deiwa pynkai khyndaw cha ka Myntdu wa kiwi de ki daw.
Hadien i ya pynyoo yumut iwi hadien iwi, da chim ya ka rai wow yaleh u pynbha ya ka Myntdu dei wym hoi de u noh ya ki Plastic, ki jri kat chawa em wei wow bood katkam i hukum ki waheh chnong wa ki dorbar chnong.
Da rai wow kyrpaad ya ka sorkar jylla u phah khloh ko yei khyndaw wa da dap ha hali ki warep ha Myntdu Pynthorneiñ wa Pynthorwah wei u su leh ka sorkar cha kiwa da chah pynsih ki hali wei dooh kba neidaw wa noh khyndaw nei pynkreh ya u sarok na Treiongriang cha Khliehtyrchi.
U kyrpaad leh ya ka sorkar u khloh ko yei khyndaw wa da dap hei thaw pynlang um ka PHE ha Myntdu Dam Mupiah wei wow khloh leh ya u chyiap uwa da pyndap ya ka Myntdu hadooh wa da jan wiar jait ki doh-um, neitæ yow yoh hok ki tre chnong ha talawiar ka Myntdu wei u yieñ i hok ka Myntdu.
Ha kani ka yalang da pynkhlan chooh chooh ya ka seiñ “Khooid Ya Ka Wah Myntdu” deiwa pynpsiah dkhot da kiwa da tip da stat wow pyrkhat bha hapoh chi snem neini heiyatoh wa ini i kaam yow em i kitkhlieh ki paidbah ya ka wah heijooh i por lada dawa i kaam u lai ujor cha ka yung bichaar High Court ka Meghalaya wa cha ka NGT.
Heijooh i por sñiaw diaw ki leh wa u DC ka West Jaiñtia kam u Chairman ka West Jaiñtia District-Environment Protection & Restoration Fund, wym em pynkrehkaam u ya ka poisa Rs. 5 lak kawa da dep thap ka seiñ ha katai ka Account.
Discussion about this post