Ka Meghalaya Pradesh Congress Committee (MPCC) da pynsñiaw ko yei thrang wa u heh warim uwa man leh u Montri Rangbah warim ka jylla, u DD Lapang u uiñ biang u cha ka Congress wow pynkhlan ya ka Party neibynta ka Election MLA 2023.
U President ka MPCC, u Vincent H Pala da ong u wa ympu yoh u wow yaklam markhmat wa u Lapang hajrong kani ka phang tangwa da ong u wa u Lapang hadooh katni dang noh i mynsien u cha ka Congress wei da ong u wa ya ini daw rah u ha ki heh ka All India Congress Committee.
Da ong u wa kiwa kreh ka Party na Ri-Bhoi District da pynsñiaw ki wa kwah ki wa u Dr. DD Lapang wow uiñ biang u cha ka Party wei wow kyntu kynrong ya ka ha Ri-bhoi, neibhah wa man u kam uwa yah luti ya ki ar ngut kiwa mihkhmat ka Congress na Ri-bhoi, u Charles Marngar uwa man u MDC na Mawhati wa u Mayralborn Syiem uwa man u MLA na Nongpoh.
U Pala da ong u wa hadooh katni kamwa da man, u Lapang ym pu pynyoo u yei mon wow uiñ biang tangwa u heh ka Congress da ong u leh wa boi ye u kylla ha i rukom pyrkhat tæ uiñ biang u, deiwa pynsñiaw leh wa chong ha i rukom krehkaam ka Party hadooh katwon ye ko wow leh bha.
