Jowai: Kamwa ha kylleiñ ki thaw yong ka ri waka jylla hi da sdang e yei dawai tika (Vaccine) wow yada na u khñiang COVID-19 ynne ka sngi, kamtæ ha West Jaiñtia Hills District leh da sdang ha Jowai District Hospital Ialong, wei heijooh i por yei e dawai deiwa Inject da sdang chwa ha kani ka thaw ya ki wakreh yong ka chnat i chait i khiah wa kynthup nadooh ki Doctor, ki Nurse wa kiwi.
Haka yalang wa pynlai da u Dr. K.C. Ajar, District Medical & Health Officer, neiliang ka Dr. M. Syngkon khana ko wa ya ini i dawai toh u e arsien heiwa ka sien wa ar won toh hadien wa dap 28 sngi naka sien wa nyngkong.
Kamwa man kiwi tawan ki e dawai tika, uni leh em hi ki kyndon wym hoi u e kam ya kiwa hapoh 18 snem, ki kynthai wa punkhon, wei kiwa dang e bu khon. I daw toh wa ya ki bru wa haap ha kani ka kynhun wym pu em dep pyrchang (Trail).
Da pyntip leh wa kiwon kiwon ki bru wa jooh yoh chitom malu mala (Reaction) hawa baam ki ya iwon iwon i baam, hawa dih dawai næ hawa chim ki kawon kawon ka tika, ya kam kini ki bru ym u hoi u chim ki ya kani ka tika.
Neitæ ym hoi u chim tika heipor wym sñiaw chait kam i iñdoh, pynhiar, emkaam u yang ki hadien wada chait bha.
Katwa ya ki bru wa em chitom wa joor kam i Cancer, klongsnam, kjut TB, kjut ha ki snier, man i wym miat yaki u chim ya kani ka tika.
Chooh chooh ka Dr. M. Syngkon ong ko wa ye hi u em ki bru wow yoh ya i wym poi pyrkhat (Side Effect) kamwa man kiwi tawon ki dawai tika, heiwa na uni u dawai ye ki u sñiaw wa kjut hei thaw wa chah Inject, ye u kjut doh, iñdoh malu mala lane kynroi prai tangwa du hadien chisngi arsngi kini daw wiar ki. Wei lada em won i iñdoh kjut khlieh emkaam u dih ya i dawai Paracetamol.
Ki Doctor wa kynthup ya u Dr. K.C. Ajar, ka Dr. R. Pohrmen, Medical Superintendent, Jowai District Hospital, kyntu joor ki yaki paidbah wym toh u artatien ki wow chim ya ini i dawai, wei heijooh i por lada dep e tika mynkna leh wymhoi won u mylliñ wow bood yaki kyndon yong ka sorkar.
Da pyntip haroh ki wa hadooh kamwa man kattæ em 27 ngut ki bru hapoh ka District kiwa dang yoh ya uni u khñiang, tangwa da phah yaki wow chongkset hapoh yung.
Neiliang u kongsan u Garod LNS Dykes, Deputy Commissioner West Jaiñtia Hills, pynsñiaw u yei sñiawngooh ya ki wakreh ka chnat i chait i khiah wei cha waroh kiwa da embynta u yakhun ya kani ka khlam nadooh ki pulit wa kiwi ki chnat waphær waphær, ki waheh chnong, ki paidbah wa kiwi neibhah wa lyngba i yakrehlang waroh ye u pynduna yei poor ka khlam.
Ong haroh u wa ka District West Jaiñtia Hills man ko kawa duna tam nei yoh kjut ki bru wa em haka chnat i chait i khiah, kamjooh ki pulit kiwa man kam ki Front Line Workers.
U Dr. E. War, Senior Pediatrician, JCH, Ialong kam uwa pdiang tika nyngkong hapoh ka District West Jaiñtia Hills, ong u i e tika hi toh kawa ye u pynbha u yada ya kiwa boon ki jait kjut, wei da em hi wot leh ki kjut wada ye u pyndooh jait neiwa wa e tika.
Neitæ da e nongmuna haroh u ya ki jait kjut kiwa da ye u pynduna lyngba i yoh tika.
Pynchlur haroh u deiwa ong kamwa ka ri India hi toh kawa hakhmat u pynmih ya ki dawai, yooluti u wa ini i dawai leh u man wa ye u yarap, wei toh u chaniah haki Scientist yong i kamjooh ki dawai wa pynmih daka sorkar India hi. Wym toh u tieñ sar neibhah kamwa man hi kiwa boon ki tika da em bait malu mala kiwa ye hi u yoh ya iwa rap phær hei doh i pran namo ka Reaction ha ki bru.
