U MLA ka AITC na Umroi, u George B Lyngdoh hapoh ka yung dorbar ynne ka sngi da pynsñiaw u yei chah ktah kiwa kamai kari hadien wa da pynbor ya ki wow yaleh bait da ka All India Tourist Permit heithaw ka Three State Permit kawa da jooh myllien ki u yaleh.
U George da ong u wa i dor ka All India Tourist Permit dapoi ko hadooh T. 25,000 katwa ka Three State Permit won chongdor ko T. 2,900 heiwa ki kari kamai Tourist wa em cha i ym toh kiwa lai cha kiwa boon ki jylla kamtæ da pynkhia ko ya ki wow su hadooh T. 25,000.
Chooh chooh da ong u wa neidaw wa em ka khlam, kiwa uiñke suwari leh duna ki wei da ktah chooh chooh wa hap ki wow su ka kuna kawa T. 10,000 manda slem u pynthymme ya ka Permit.
Neiliang ka seiñ kiwa kamai kari Tourist leh da dep ki wow e dorkhat hajrong ini cha ka chnat Transport ka jylla.
Hawa e yei jubab hapoh ka yung dorbar, u Montri ka chnat Transport, u Dasakhiatbha Lamare da pyntip u wa dang ini wa dep hi wot, ka chnat da mynjur ko ha ka 22-02-22 wow chah biang wow pynthymme lane wow e biang da ka 3 State Permit ya ki kari kamai Tourist.
Da ong u wa hao, ini da ktah bha ko ya kiwa kamai kari khamtam hawa wan ka khlam wei oo leh da dep u wow yachem wa kiwa kamai kari kiwa da khana yeini i jooh wa chem chitom ki hadien wa da pynbna da ka sorkar India wow pynkrehkaam da ka All India Tourist Permit.
Heiyatoh waka kuna wa da hap su ki, u Montri da pyntip u wa dang kreh khlem chong ngiah yow chem ya ka luti wa biang dooh wow chim, deiwa pynrap wa ini toh iwa rap eh ya kiwa kamai kari wei daw yaleh katwa ye yow pynduna lane pyndooh ya kani ka kuna.
