Ka dhab ki Montri Sorkar da mynjur ki ya ka Meghalaya Witness Protection Scheme, 2025 wow e yada ya kiwa sakhi kiwa wan e sabut ya iwa jia waphær waphær hapoh ka jylla.
Hawa pyntip yeini hadien ka yalang, u Montri Rangbah ka jylla, Conrad K Sangma da ong u wa em 3 tylli ki aiñ wa thymme yong ka Bharatiya Nagrik Suraksha Sanhita (BNSS) kiwa da pynkrehkaam da ka sorkar pyrdi wa ki sorkar jylla wei ha katai ka aiñ kawa thymme da em ki kyndon wa e yada ya kiwa e sakhi lyngba ka Scheme ya kawa ka sorkar Meghalaya da e ko yei mynjur kattu.
“Hadien wa da pynchong yurim i da mynjur i ya ka Meghalaya Witness Protection Scheme, 2025 da i thmu wow e yada wa kongsan ya kiwa sakhi hajrong i jia waphær waphær”, da ong u Conrad ha ka sngi wa ar.
Hawa batai hajrong kani ka Scheme, u Montri Rangbah da ong u ha man ki District daw em ki Committee wa khlieh da ki District Magistrate wei da em leh ki dkhot na ki bor sorkar wei kini ki Committee daw chim ki yei rai katkam i long i man yong i chah maham wei yei emkaam wow e yada ya kiwa sakhi wa kiwa wan e sakhi, kawa ye u man wow booh da ki bru wow e yada khnang wow ye ki u wow wan e sakhi wei i phla lyngba ka Camera.
“Em boon ki kyndon wow e yada wei da booh ha ki Rules, wei kini man ki katkam ka aiñ wa da wanrah thymme wei hapoh kani daw wanrah leh ki Scheme waphær waphær,” da ong u Conrad.
Ha iwi won i liang, u Montri Rangbah da pyntip u wa ka dhab ki Montri Sorkar da mynjur ko yei pynkylla (Amendment) yong ka Meghalaya State Language Act, 2005 yow ye u pynkrehkaam ya ka Associate Official Language (Khasi) ha Eastern West Khasi Hills District.
U Conrad da ong u wa katkam ka Meghalaya State Language, 2005, ki Associate Language ha ki District waphær waphær ka jylla da em lut ki wei ini da hap wow leh khamtam hawa thoh Exam neibhah ka Eastern West Khasi Hills toh ka District wa thymme.
Discussion about this post