Ka sorkar ka jylla Sikkim da pynbna ko wow khang noh yei dai ya ka um wa dei song namo ki Packaged Mineral Water hapoh ka waroh kawi ka jylla nadooh ka 01-01-2022.
Ya ini da pynbna da u Montri Rangbah ka jylla u PS Tamang ynnin ka 2 tarik.
“Ka jylla Sikkim toh kawa da kyrkhu da ki um wa khooid wa jngiar wa ka umdih wa bha tam,” da ong u PS Tamang hawa klam ha ka Gandhi Jayanti, deiwa ong u leh wa da ini khang, ki bru daw jied ki wow pynemkaam da ka um wa da e ka bei rymaw kawa bha chiboon bar ya kiwa da song ha ki klong Plastic.
“Waroh ha Sikkim kattu daw hap ki wow dam noh u pynemkaam ya ki klong song um deiwa jied da ka um wa e da ka bei rymaw,” da ong chooh chooh u.
U Montri Rangbah da ong u leh wa i e por le bnai daw yarap wow pynlut noh ya ki klong um kiwa da em chwa ha ki dukan.
Wa u Tamang da emlang u Lat ka jylla, u Ganga Prasad heipor wa pynman yei pynkhooid chnong heiwa da khana u leh wa ka sorkar daw leh ko yeiwa emkaam yow lait ki um da dep song wow poi na baar ka jylla.
Ha Sikkim ha ki thaw uiñke suwari kam ha Lachen ha North Sikkim da dep wow khang yei pynemkaam ya ki klong Plastic wa song um.
