Ka Dorbar Chnong Nongjrong da pynbna ko wa daw khang noh ya ka Nongjrong Viewpoint wa waroh ki thaw uiñke suwari wa em hapoh yong ha ka sngi Sunday deiwa sdang nadooh u January 2026.
Ka chnong da khang ko leh ya kiwon kiwon wow psiah ki nadooh i miet ka Saturday hadooh wa kut ka sngi Sunday wei waroh ki thaw sah (Homestay) u man ki kiwa khang ha kini ki sngi.
Ya kani ka rai da chim deiwa yaklam wei ya phyllu yillu kiwa chong chnong yow pyrkhat yei boon kiwa uiñke suwari neibhah wa da khia kaam ware hadooh wym yoh de u chong ngiah wei da emkaam wow booh kawi ka sngi kam ka sngi chuti.
Yow lait leh u khynnia ware, ka dorbar chnong da phah ko wow leh ya ka Pre-Booking ya ki Homestay nadooh Monday hadooh Saturday.
Da kyntu leh ya ki paidbah wow pynemkaam ki da ka Google Map yow tip kiwon ki thaw sah kiwa em sakhiat yow lait u chah thok.
Da ong ki wa hanla wa ini wa leh kamni daw pynthut ko ya kiwa uiñke suwari, tangwa da kyntu ya ki paidbah wow ya krehlang ki ha ka sngi wa khang yow em i suk i saaiñ wei yei bha i miat ka chnong ka thaw.
Ya kiwa uiñke suwari u pteiñ u pdiang ki Monday hadooh Saturday.
Discussion about this post