Hadien wa da lang i jhep ha Iawmusiang, Iawthymme wa kamjooh ha ki manyung ki bru la kattu katni tayaw, ynne ka Synjuk Waheh Chnong Jowai da pynman ki ya ka yalang wow pyrkhat hajrong ini i bynta wa kamjooh heiyatoh wa kiwi ki kaam ka Synjuk.
Hadien ka yalang hawa yaklam wa u General Secretary ka Synjuk, u Riquoma Rq. Laloo da pyntip u wa da yoh yutip na u Deputy Commissioner, West Jaiñtia Hills District wa kammon la kammon mynstep ka 5 tarik daw pynkhooid noh ya i jhep.
Da ong u wa lada ya ini i jhep ymye u pynkhooid ha ka 5 tarik daw lai yachem biang ki ya u Deputy Commissioner wei ha ka 6 tarik u khang noh ya waroh ki yaw wa em ha sor Jowai.
Heiyatoh wa i jhep na ki manyung ha kylleiñ ka Jowai, u Laloo da ong u wa ym myntoi u pynkhooid ya i jhep du na ki yaw katwa ha yung won neh i, wei emkaam u pyntikna wa i thaw wa noh ya i jhep toh u man i iwa paka wei pura.
