Ki bor District ka West Jaiñtia Hills wa kynthup ya u SP, u Magistrate deilang wa ki sahep ka PWD ynne da lai pait lai sylli ki ya ki Speed Breaker wa em ha Jowai nadooh i bynta ka Marian Hill HS School hadooh ha laad Kiang Nangbah Govt. College kiwa em 9 tylli ha u sarok wa jrong du kamwa 3 Km.
Ya ini da leh hadien wa mih chiboon i ood na ki paidbah kamjooh kiwa kamai kari wa i em kini ki Speed Breaker da wanrah i ya chiboon i sahkut kari kamjooh da ktah ki yei kamai kamjooh ya ki khynnah skur wa kamjooh kiwa lai beh kreh beh por.
Hadien ini i lai pait da chim ya ka rai wow khloh noh soo tylli kini ki Speed Breaker kitæ uwa em ha laad wow lai cha Jaiñtia HS School, uwa em ha laad wow lai cha Jowai Public School wa uwa em ha laad wow lai cha North Liberty HS School katwa uwa em ha ka laad wow lai cha Iawthymme daw khloh tangwa u rah noh oo hajan i bynta ka SBI Ladthadlaboh Branch.
Ya kiwi daw ieh u neh ki kamjooh heiwa neiliang ki sahep ka PWD da pyntip ki wa daw siang psiang yow lait kini ki Speed Breaker u ad ware iwa da pynsuki wei pynthut bha yei lai ki kari.
Da pyntip leh wa neidaw wa pyrkhat yei chngaaiñ kiwa lai wa wan ym looid ya waroh kini ki Speed Breaker neibhah wa da dep em ki jia wa sñiawsih khamtam hei miet wa pynhær kari ki bru ha uni u sarok.
Neiliang u SP da lai pait u leh ya kiwi ki thaw wa khynnia ha Iawmusiang khamtam ha ki bynta wa em hakhmat ka Thomas Jones Synod College neidaw i pynyieñ ya ki kari kamai khlem da yoh bor na kiwon kiwon.
