I yoh kem ki pulit ka Assam ya 1 lak churia u khoo wa khia 50 kg kawi kiwa toh neibynta ka Supplementary Nutrition Programme (SNP) wa pynkrhekaam da ka Department of Social Welfare neibynta wow e baam cha ki khynnah lyngba ka ICDS hapoh Meghalaya heiwa da yoh kem ya uni u khoo na u Deepak Agrawal naka Godown wa em ha Assam heiwa uni u bru leh toh u tre ka Company Continental Milkose, da pynyoo yei pteiñ ki kaam baam-tooh hawa pynkrehkaam ya ka SNP hapoh Meghalaya, da ong ka Angela Rangad.
Da khana ko wa 10 snem nachwa deilang wa ka Agnes Kharshiing wa u Tarun Bhartiya (uwa man kam u Advisor cha ki Commissioner ka Supreme Court ka India ha ka mukotduma Right to Food) da pynsñiaw ki yei wym chaniah ya kani ka Company wa da emkti ko ha ki kaam baam-tooh ya ki kaam SNP heiwa da ujor leh cha ka sorkar hajrong ini heiwa da toh wow Blacklist noh ka.
Kamtæ da kylli wa ileh ya kani ka Company da pynemkaam biang da ka sorkar neibynta kani ka prokram wa emkaam bha wow e baam ya ki khynnah, ki khynnah kynthai, ki manbei yow yaleh pyrchah nei duna baam wa tei iwa yarap ya kiwa dang punkhon kamjooh ki khonboo wa dang kha hapoh ka Meghalaya kawa em boon bha kiwa yap hadien wa kha.
Da ong leh wa ya kini ki SNP da toh wow pynlai da ki ki seiñ kynthai wa ki SHG kamjooh yow pynemkaam da ki baam wa da chna ha ki chnong ki thaw hi. Tangwa ha Meghalaya ya ka SNP da chah ksoh wei pynlai da kiwa da suba chwa ki wym khooid wow chna baam (Fortified Food) kiwa krehkaam cha baar ka aiñ kamwa man ka Continental Milkose.
Da ong leh wa i pynche da ka Social Welfare Department pynyoo ko wa kini kiwa khayi namo Supplier dang em hi ki wei da man ko i kaam wa emkaam wow paitbha paitbniah, kamtæ ka Thma U Rangli Juki da khut ko ya ki padbah wow leh ki ya ka Social Auditing ya ka SNP deilang ya kiwa pynpoi ya ki marbaam.
