U Regeenal Shylla uwa chong chnong ka chnong Moolang, East Jaiñtia Hills District uwa da chah jied wow man kam u kyrtong MDC na 22-Musniang Rangad Constituency ka JHADC kam u kyrtong ka BJP, da khana u ya ki yurim wow yieñ yaleh u ya kani ka Election MDC wa daw pynman ha u 2025.
Da ong u wa lada jop Election, hapoh chi snem u chim u yei por u lai luti neibynta u mooyong wei lada ym ye u wai mooyong hapoh chi snem, u Resign noh u kam u MDC yow man biang kam u bru paidbah tangwa yei kaam u mooyong u lai hi u chaphrang.
Da ong u leh wa ka Party BJP u wai ko ya u mooyong ha itæ i rukom wa ye u khrehlang khihlang ki heh wa ki khian leh, wot neibynta kitu ki tre paar mooyong kiwa em paar hapoh 100 Hectare neibhah kamwa da booh kyndon ka sorkar Meghalaya wa du kiwa em 100 Hectare chaneiñ donhi kiwa ye u kreh mooyong deiwa yaleh Prospecting License wa ki Mining Lease, wei katkam ka hukum ka High Court ka Meghalaya, ka 100 Hectare wa da booh da ka sorkar Meghalaya ymtoh ka rai wa khaddooh wei ka sorkar dang pyrkhat ko neibynta kitu kiwa em thaw hapoh 100 Hectare.
“Nga man O kam uwi na kiwa khreh paidbah wa khian tam tangwa ka sorkar Meghalaya dan khih win ko lyngba ki kaam wa lai luti O neibynta i eh yong ki paidbah wei lada jop O ya ka Election MDC na ka Party BJP, daw nang yoh bor chooh chooh O u lai luti chaphrang neibynta ki kaam paidbah neibynta i eh ha ka kaam mooyong katni wa chah yoohbeiñ cha ñioom beiñ ki khih ki khan yong i ha kini ki heh ki haaiñ, lada jop la rem O leh tangwa u booddien O yeini i kaam wei u yaleh hadooh wa jop ym kynrandien O,” da ong u Regeenal Shylla.
Da khana u wa oo toh man u kam uwi na kiwa kreh paidbah uwa da lai luti da slem heiwa da sakhi u yei eh ki paidbah nadooh i dooh khih dooh kreh iwa pynsah doom ya ki paidbah ha ka thaaiñ wei waroh ini toh du ka BJP kawa man kam i dawai wa ye u pynwiar ya ini i kjut neibhah ka toh kawa synchaar leh hapoh ka sorkar pyrdi wei du ka BJP donhi ka Party wa ye u yarap ya ki paidbah heiliang ki Scheme ka roi ka paar, ki kaam wow pynlait nei chah teh chah khoom khamtam i khang ka NGT ya u mooyong nadooh u snem 2014, wei hadooh katni leh da tam chiphaw snem ympu ye wow pynlait yeini.
Da ong u leh wa lada ki paidbah pyrkhat sani bha ki, wa ka ri India hapoh i yahkhmat da ka Party BJP ye ko u pynku ya ka khayi pateiñ (Economic Growth) hadooh wa da man ka India kam kawa em hei wa san kawa smat dooh wow heh u san hei kamai kajih hapoh pyrthai.
Hapoh ka BJP, ka India da man ko ka ri kawa nyngkong dooh wow ye u hiar ha u South Pole u Bnai, kawa e Special Central Scheme neibynta ki ST/SC wa ya ki kynthai kam ka Prandhan Mantri Yojana, ka Pradhan Mantri Vandhan Yojana, ka Vulnerable Tribal Groups Development Programme, Prime Minister Employment Generation Programme, National Rural Livelihood Mission, Vanbandhu Kalyan Yojana, National Scheduled Tribes Finance and Development Cooperation, Regeneration of Traditional Industries wa kiwi kiwi de najrong ki Scheme umbaam umdih ha man ki chnong, ki Scheme neibynta ki longyung manyung wa dooh wa duk, ki Scheme chna paikhana, ki Scheme Khoo Ration, ki Scheme Gas Cylinder, ka Scheme Smart Card neibynta kiwa thiah kjut ha Hospital wa kiwi de.
Da pynkut u deiwa e khublei ya u Blai kynrad uwa booh wa thoo kamjooh da e khublei snem thymme wa suk wa kmen u ya waroh.
Discussion about this post