Shillong: U National Vice-President ka BJP, uwa pait ya ka jylla Meghalaya, u Dr. M Chuba Ao da ong u wa ka BJP ha Meghalaya u pteiñ ko u kyrchaan ya ka sorkar MDA wa yahkhmat da ka NPP ha ka jylla.
U Ao uwa da wan ha Shillong wow pynkhlan ya ka BJP ha ka jylla, da ong u wa ka Party u em bait ko ha ka sorkar hadooh wa kut ka samoi krehkaam.
Hajrong i pynbaad ki heh ka BJP Meghalaya wa em i kaam baam-tooh ha ka sorkar MDA, u Ao da ong u wa daw yaklam bha yeini wa u President ka Party na ka jylla, deiwa klam che leh wa ymye u ong lada kyrchaan namo pyrchah u yeini i pynbaad tangwa katkam wa man katni da em i sñiawthooh yumut hapyrdi ka BJP wa ka NPP.
Heiyatoh wa i dawa takit da ka CBI hajrong ki kaam baam-tooh da ki ADC, u Ao da ong u wa hajrong ini i pynbaad toh u em leh ki sabut wei yeini dang yaklam yow pynsakhiat.
Da ong u wa ka Party ymye ko wow pynbaad hi-eh ya ki lok wa yakrehlang ko wei kiwi leh ymye ki wow pynbaad bait ya ka BJP weiwa ka BJP ym kychaan wei ym elaad ko ya ki kaam baam-tooh.
Hajrong i klam u Symbood Montri Rangbah, u Prestone Tynsong wa ka BJP ye ko wow mih noh lada ym hun ko wow kreh wa ka sorkar, neiliang u Ao da ong u wa ini i klam ymtoh iwa bakla wei waroh ki seiñ saiñ pyrthai em ki jar jiar i sñiaw wei ka BJP leh ye ko u ong ya kiwi wa lada ym hun ki ye ki wow mih.
