U Montri Rangbah ka jylla, u Conrad K Sangma ynnin da lai yooh kjat u ha Don Bosco Technical School, Shillong wei da saam u leh ya ki Certificate cha kitu kiwa da pyndep yei puræ kamjooh ki chithi thung kreh.
Hawa yaklam wa kiwa chah hikai ha kani ka thaw, u Conrad da ong u wa chynna sakhiat ya itæ i thrang mynsien ki wow leh iyi ræ iyi hawa im ki deiwa ong leh wa ki khynroo toh i bor ka jylla waka ri hi waroh kawi tangwa iwa eh toh u tip kammon wow pynemkaam ya ini i bor neibynta iwa bha.
Da khana u ya ki wa ka sorkar ha kini ki snem wa da dep da kreh chitom ko wow booh thong yow e sikai da ki jait wa daw yarap u pynku ya ka khayi pateiñ, i seiñ khih hapoh ka jylla yow pynman ya ka mynried kawa skem.
Da yaroh u leh ya ka Don Bosco Technical School, deiwa ong wa ki khynroo khyllood kiwa da dep puræ ya ki jait hikai du na kani ka Technical School boon ki boon chah hawa kheiñlang ha waroh kawi ka jylla, kamtæ da e khublei u ya kani ka Don Bosco Technical School ya ki kaam wa bha wa da leh ko.
Da khana u leh wa ka sorkar da booh ko ka thong wa pynmih 5 lak tylli ki kreh ha kiwa boon ki liang wei da kular u wow ya krehlang waka Don Bosco Technical School yow poi cha ka thong. “Ka Don Bosco Technical School daw man ko ka lok wa biang bha yaka sorkar kiwa ye wow yarap kylliang yow pynheh pynsan yow ye u poi cha ka thong deiwa ya krehlang,” da ong u Conrad deiwa kyntu leh ya kani ka Technical School wow pynku kyrdan wei wow lai katkam ka juk wa katni yeiwa da e sikai ki.
Ha kani ka sngi neiliang u Montri Rangbah da jubab u leh yeiwa da kylli kiwa lai puræ heiyatoh ki kaam ki jaam wa kiwi de ki thong wa da booh ka sorkar neibynta ki khynroo.
