Shillong: U Montri ka sorkar jylla wa pait ya ka chnat rep i riang, u Banteidor Lyngdoh da ong u lada em i ah kilo pyrchah-aiñ ki warep toh u ujor ki cha ka aiñ næ cha ka yung krehkaam u Syiem ka Hima Mylliem, wei lada ka sorkar dang chem ko wa em wa pteiñ u leh yeini daw kem wei daw kset ya ki cha patok.
U Banteidor ynne ka sngi da lai pynche u cha ki warep ha yaaw dailang neibhah wa em i yakhih pyrchah yong ki yei rukom ah kilo khiar ya ki mar rep wa lai dai ha kani ka yaaw. Ha kani ka sngi da synraan lang ya u Montri da u Chief Executive Member (CEM) ka KHADC, u HS Shylla, u EM wa pait ya ka yaaw u Jansing Tynsong, u Acting Syiem ka Hima Mylliem, u Paiem Ainam Manik Syiem, ki Montri ka hima, wa ki sahep sorkar.
Hawa klam ha ka yalang u Banteidor da ong u wa ka dwar ka sorkar wai ko neibynta wow pynbait yei eh i khoo ki warep neibhah em ko i sñiawkhia yei eh i khoo yong ki.
“Ka sorkar ym kwah ko wow luchia ya ki kaam ha Ïewduh neibhah wa haap ko hapoh i pait ka Hima Mylliem, tangwa ym yohsa wow wan hawa chem chitom ki warep. Kwah O wa ya ini i kaam u pynkut noh myntu ka sngi, wei ym kwah O wow tip wa dang pteiñ i chah ah kilo ki mar,” da ong u Banteidor.
U Banteidor da ong u wa u warep toh uwa stat wei ymtoh wow chah ah kilo ki mar yong ki namo wow booh dor da ki mahajon wei emkaam yei yatylli para ki wei wow booh dor leh pyn daki (warep) hi.
U CEM ka KHADC, u HS Shylla da ong u wa kiwa sikai yeini i chim kabu toh ki baar jylla, wei lada yadai yathied para Khasi ym em kam kini wow chim kabu.
Da ong u wa ka sorkar nadooh ki snem kiwa nachwa da toh wow booh ko yei dor neibynta ki mar rep, tangwa hadooh katni ymye ko neibhah wa chaniah ko du ya ki sahep IAS kiwa tlot ki wym jooh tip yei eh i khoo ki warep.
U CEM da kyntu u ya u Montri wow booh ya ki kudam næ ki yaaw dailang yong ka sorkar ha ki khapsor ryngkat wei dor wa da pynyang, katæ ha Lad Smit, Upper Shillong wa Mawiong khnang wa lada i dor ha yaaw hiar i, ki warep ye ki wow dai ha ki yaaw wa da booh da ka sorkar.
“Heipor wa man montri O ha ka sorkar da yaklam yeini, tangwa ymye wow leh iwon iwon neibhah wa luchia ki kharkaya wei ym jooh chah ki wow booh ya ka yaaw sorkar,” da ong u, deiwa pybaad deiwa ong, “Ha Meghalaya da thied ki kharkaya ya ka sorkar, tip katni won da lait namo pu lait neitæ i chah kdoh.”
Heiyatoh wa i chahah kilo ki mar, neiliang ka Jessica Malngiang kawi na kiwa khayi jhoor ha Ïewduh da ong ko wym jooh booh dor ki tangwa kylli ki yei dor pyn na ki warep.
“Em ki mar rep kiwa ra-um em leh kiwa da kheiñ næ sih noh hawa thap, teiñ teiñ haap ah 5 kilo, wow ong wa ah i 10 kilo na ka 50 kilo tæ ym em kam katæ. Na ka 50 kilo ah i 3 kilo wei na ka 30 kilo ah i 1 kilo wei ini leh ymtoh wa ah da kiwa khayi tangwa da kiwa thaw khia,” da ong ka Jessica.
Da ong wa ki bor wa pait toh u tuklar ki leh ya ki mar rep wa dai ha ki chnong nongkyndong neibhah ki warep da dai bait ki cha ki dkhar wa wan na Assam katæ leh ki pyrla wa wanrah na ki.
“Ka mar wa poi cha yaaw toh 30 percent, cha ki chnong ym jooh em wa tuklar deiwa wanrah pyrla ki dkhar na Assam kawa waroh tip ki wa man ko kawa khia chiliang,” da ong ko.
Hadien wa ap ya ki waroh arliang neiliang u Banteidor ryngkat u CEM wa u Syiem da e yumut ki wa toh u pynbait lang yeini i kaam wa ka Hima Mylliem deiwa emlang ki warep wa kiwa khayi kawa emlang kiwa mihkhmat na ki warep wa kiwa khayi.
Discussion about this post